پاکستان اوردوسی مطبوعات سۉزلاوچی احمدشریف چودری افغانستانگه هوا هجومی اویوشتیریلگنی حقیدهگی ادعالرنی رد اېتدی.
جیونیوزنینگ خبریگه کۉره، چاودری دولت تلویزیونیگه بېرگن صحبتیده، «پاکستان افغانستانگه هجوم قیلمهگن. طالباننینگ عیبلاولری اساسسیزدیر.»
بو اظهاراتلر بوندن نېچه ساعت آلدین پاکستان افغانستان توپراغیگه هجوم قیلگنی بیلدیرگن بیر پیتده تیلگه آلیندی. اوندن آلدین اېسه طالبان مطبوعات سۉزلاوچیسی ذبیحالله مجاهد پاکستان اوردوسی خوست، کنر و پکتیکا ولایتلریگه هوا هجومی قیلگنینی ایتگن اېدی.
مجاهدنینگ سۉزلریگه کۉره، پاکستاننینگ خوستدهگی هوا ضربهسی نتیجهسیده تۉقّیز نفر باله و بیر عیال اۉلگن.
چودرینینگ ایتیشیچه، پاکستان برچه حربي عملیاتلرینی آشکارا عملگه آشیرهدی و هېچ قچان تینچ اهالیگه هجوم قیلمهیدی. او، «بیز دولتمیز و فقط دولت صفتیده جواب بېرهمیز» دېدی.
اونینگ ایتیشیچه، پاکستاننینگ معماسی «طالبان رژیمی» بیلن، افغانستان خلقی بیلن اېمس.
چودری، «طالبان حکومتی قچانگچه وقتینچهلیک بۉلیب قالهدی؟ نېگه اولر دولت بۉله توریب، قچانگچه موقب بۉلیب قالهدی؟» دېب سوال قۉیگن.
شونینگدېک، او «بیزنینگ نظریمیزده یخشی یاکه یامان طالبان دېگن نرسه یۉق. ترورچیلر آرهسیده هېچ قندهی فرق قۉیمهیمیز.» دېگن سۉزنی تیلگه آلگن.
طالبان و پاکستان اۉرتهسیدهگی مذاکرهلر موفقیتسیزلیککه اوچرهگچ، ایکّی تامان اۉرتهسیدهگی ترنگلیک ینه کوچهیماقده.
طالبان مطبوعات سۉزلاوچیسی اۉز بیاناتیده پاکستاننینگ پکتیکا، خوست و کنر ولایتلریگه اویوشتیرگن هوا هجومینی افغانستان توپراغینی آیاق آستی قیلیش، همده خلق ارا معیارلرنینگ آچیق روشده پایمال قیلینیشی دېب اتهدی.
اونینگ ایتیشیچه، «پاکستان حربيلرینینگ بو کبی جنایتی هېچ قندهی نتیجه بېرمهیدی. بو ایشلر ناتۉغری معلوماتلرگه اساسلنگن بۉلیب، وضعیتنینگ ینهده کېسکینلشووی، شرمندهلیک و پاکستان حربي رژیمینینگ موفقیتسیزلیگی بیلن یکونلنهدی.»
طالبان بو «بوزیلیش و جنایتنی» کېسکین قارهلب، «اۉز وقتیده مناسب جواب بېریلیشینی» ایتگن.
