بیرلشگن ملتلر تشکیلاتینینگ باش کاتبی آنتونیو گوترش خاتین-قیزلرگه نسبتاً زۉروانلیکنی یۉق قیلیش خلق ارا کونی مناسبتی بیلن بېرگن پیامیده، عیاللر و قیزلرگه قرشی زۉروانلیک گلابل معما بۉلیب، رقملی دور تکنالوژيسی تېزلیگی و کیریش امکانیتی بیلن ینه-ده کوچهیهدی دېگن.
«رقملی فضالر عیاللر و قیزلر اوچون خوفسیز بۉلمهگن جایگه ایلنیب قالیشیگه یۉل قۉیه آلمهیمیز.» دېگن او.
بیرلشگن ملتلر تشکیلاتی باش کاتبی رقملی فضانی حمایه قیلیشنی طلب قیلگن و مملکتلردن مجازی زۉروانلیکنی جنایت دېب حسابلشنی سۉرهگن.
آنتونیو گوترش تکنالوژي شرکتلریدن اۉز پلاتفورملرینینگ خوفسیز و جوابگر بۉلیشینی تأمینلشلرینی طلب قیلگن.
او شوندهی دېیدی: «کېلینگ، هر بیر عیال و قیز اوچون قۉرقووسیز دنیانی بیرگهلیکده قورهلیک.»
«عیاللر و قیزلرگه قرشی رقملی زۉروانلیکنی توگهتیش» بو ییلگی خاتین-قیزلرگه نسبتاً زۉروانلیکنی یۉق قیلیش خلق ارا کونی نینگ شعاری.
بیرلشگن ملتلر تشکیلاتینینگ افغانستاندهگی ادارهسی اوشبو شعارگه اشاره قیلیب، رقملی علاقه کۉپلب افغانستان عیاللری اوچون ضرور واسطهگه ایلنگنینی بیلدیرگن.
شونینگدېک، بو اداره آخرگی پیتلرده 48 ساعت دوامیده اینترنت اوزیلیشی عیاللرنینگ خوفسیزلیگی، شأنی و اقتصادي برقرارلیگینی تأمینلشده رقملی امکانیتلرنینگ اهمیتینی کۉرسهتگنینی قید قیلگن.
