بیرلشگن ملتلر تشکیلاتینینگ افغانستاندهگی یاردم دفتری (یوناما) و اونینگ عیاللر بۉلیمی خاتین-قیزلرگه نسبتاً زۉروانلیکنی یۉق قیلیش خلق ارا کونی مناسبتی بیلن بیرگهلیکده اعلان قیلگن بیاناتیده، افغانستان عیاللری کېنگ کۉلملی و مثلی کۉریلمهگن زۉروانلیککه، جملهدن حقوقلرنینگ بوزیلیشی همده جسماني و روحي ضررلر بیلن یوزلشهیاتگنینی معلوم قیلگن.
بیاناتگه کۉره، ایکّی ییلدن کمراق وقت ایچیده، زۉروانلیککه یوقاری درجهده دچار بۉلگن قیزلر و عیاللر سانی ۴۰فایزگه آشگن و حاضرده۱۴.۲میلیون عیال حمایه و یاردمگه محتاج.
طالبان حاکمیتگه قَیتگچ، عیاللر حقوقلری و اېرکینلیکلریگه قتّيق چېکلاولر اۉرنتگن. حاضرده افغانستان عیاللری و قیزلری اېنگ اساسي حقوقلریدن، جملهدن اۉقیش و ایشلش حقوقیدن محروم.
بیرلشگن ملتلر تشکیلاتینینگ بیاناتیده، «افغانستانلیک عیاللر حالتی اېنگ آغیر زۉروانلیک حالتلریگه اۉخشهب، زۉروانلیک قندهی شکللنیشی و عیاللرنی حمایه قیلیش اوچون یرهتیلگن توزیلمهلر قندهی تېزده یۉق بۉلیب کېتیشی ممکنلیگینی کۉرسته دېب ایتیلگن.»
بیرلشگن ملتلر تشکیلاتی گلابل تېزکار قۉللب-قوّتلشگه اورغو بېریب، جنسیتگه اساسلنگن زۉروانلیکلر یاردم مبلغلری کمهییشی بیلن بیر وقتده آرتیب بارهیاتگنینی قید قیلگن.
یوناما باشلیغی و بیرلشگن ملت تشکیلاتی باش کاتبینینگ افغانستاندهگی مخصوص وکیلی اۉرینباسری جورجیت گانیون «افغانستان عیاللریگه نسبتاً زۉروانلیک فقط کۉریش و اېشیتیش بیلن چېکلنمهیدی؛ او اولرنینگ آوازینی اۉچیریش، کېلهجککه اېشیکلرنی یاپیش و اولردن تارتیب آلینگن حقوقلرنی هم اۉز ایچیگه آلهدی.»
جورجیت گانیون طالبان چېکلاولرینی بېکار قیلیشنی طلب قیلگن و بوتون دنیادن عیاللرگه حیاتي یاردم بېریش امکانیتلرینی سهقلب قالیشنی سۉرهگن.
یونامانینگ معلوم قیلیشیچه، یاردملرنینگ کېسکین کمهییشی بیرلشگن ملتلر تشکیلاتی و همکار تشکیلاتلرنی عیاللرنی اقتصادي قۉللب-قوّتلش و قوتقریش خدمتلرینی تۉختهتیشگه یاکه کمهیتیریشگه مجبور قیلگن.
بیرلشگن ملتلر تشکیلاتی بیاناتیده ایتیلیشیچه، جاري ییلده افغانستاندهگی عیاللر رهبرلیگیدهگی تشکیلاتلر بودجهسینینگ تخمیناً بېشدن بیر قِسمینی یۉقاتگن.
بمت عیاللر بۉییچه مخصوص وکیلی سوزان فرگوسن آگاهلنتیریب، عیاللر رهبرلیگیدهگی تشکیلاتلرگه یاردم کمهییشی، مثلی کۉریلمهگن چېکلاولر و کوچهیتیریلگن نظارت اولرنینگ اېنگ ضعیف گروهلرگه یاردم بېریش قابلیبینی چېکلهیدی.
بیرلشگن ملتلر تشکیلاتی افغانستان عیاللری و قیزلری بیلن گلابل بیردملیکنی ینگیلش، جنسیتگه اساسلنگن زۉروانلیکنینگ آلدینی آلیش اوچون ماسلشووچن مالیهلشتیریشنی آشیریش و عیاللر رهبرلیگیدهگی تشکیلاتلرنی قۉللب-قوّتلشنی طلب قیلگن.
