«خاتین-قیزلرگه نسبتاً زۉروانلیکنی توگهتیش خلقارا کونی» عرفهسیده افغانستان عیاللرینینگ ناراضیلیک حرکتلرینینگ ایتیشیچه، طالبان مملکت عیاللریگه نسبتاً زۉروانلیکنی مقصدلی و اویوشگن سیاستگه ایلنتیرگن.
«عیاللر امید آینهسی حرکتی» بوگون (دوشنبه، ۳ قوس) اعلان قیلگن بیاناتیده تأکیدلشیچه، سۉنگّی تۉرت ییل ایچیده افغانستان عیاللری اېنگ آغیر توردهگی زۉروانلیک، باستیریش و تیزیملی کمسیتیش آستیده یشب کېلیشماقده.
«افغانستان عیاللرینینگ سیاسي اشتراکی ترماغی» هم اۉز بیاناتیده، مملکتده زۉروانلیک و چېکلاولر رسمي سیاستگه ایلنگن بۉلیب، عیاللر و قیزلر هر کونی تورلی شکللرده چېکلنیش، چېتلشتیریش و زۉروانلیککه دچار بۉلیشماقده دېب بیلدیرگن.
ترماق طالباننینگ تعلیم، ایش و جماعتدهگی اشتراکگه قۉیگن چېکلاولریگه اشاره قیلیب شوندهی دېگن: هېچ بیر عیال جنسی طفیلی تعلیمدن، ایشدن، اېرکینلیکدن، قدر-قیمتدن و خوفسیزلیکدن محروم بۉلمسلیگی کېرهک.
حرکتنینگ ایتیشیچه، طالبان نینگ عیاللرگه قرشی سیاستی «انسانیتگه قرشی جنایت» و «جنسیتی آپارتاید» بۉلیب، بو بارهده اولر جوابگر بۉلیشی لازم.
«افغانستان عیاللرینینگ آزادلیک اوچون بیرلشگن حرکتی» اېسه تأکیدلهگن، افغانستانده عیاللرگه نسبتاً زۉروانلیک کۉپ قتلملی و توزیلمهوي بۉلیب، عایلهوي، حقوقي، اجتماعي، اقتصادي و سیاسي ساحهلرده قَیته ایشلب چیقریلماقده.
اولر نینگ ایتیشیچه، سۉنگّی تۉرت ییل ایچیده افغان عیاللری زمانهوي تاریخدهگی اېنگ آغیر چېکلاولرنی باشدن کېچیریشدی، بو تعلیم و ایش منع اېتیلیشی، کيینیش و حرکتلنیش چېکلاولری، عیال فعاللرنی حبسگه آلیش و غایب قیلیشنی اۉز ایچیگه آلهدی.
بو حالت انیق انسان حقوقلرینینگ بوزیلیشی و عیاللرگه قرشی تیزیملی جنایت صفتیده بهالنماقده.
اوچ حرکت دنیا جماعهچیلیگدن افغانستان عیاللرینی کوچلی قۉللب-قوّتلشنی، جنسی آپاراتایدنی تن آلیشنی، طالباننی جوابگرلیککه تارتیشنی و اولرنینگ کمسیتووچی سیاستلری قرشیسیده سکوتنی بوزیشنی طلب قیلگن.
طالبان حاکمیتگه قَیتگندن بېری عیاللرنینگ اساسي حقوق و اېرکینلیکلرینی کېسکین طرزده چېکلب قۉیگن تعلیم و ایشنی منع قیلیش، جماعتدهگی اشتراکینی اېسه نهایتده کمهیتیرگن.
