پاکستان پولیسی، خیبرپختونخوا ایالتیده محلي «تینچلیک کمیتهسی»گه اویوشتیریلگن عصیانچیلر هجومیده یېتّی کیشی هلاک بۉلگن و ینه بیر کیشی یرهلنگنینی تصدیقلهدی.
جینوزنینگ خبریگه کۉره، بو هجوم تیناوون (پنجشنبه، ۲۹ عقرب) ساعت تخمیناً ۲۱:۰۰ خیبر پختونخوا ایالتینینگ بنوی اولسواللیگی «هوید» منطقهسیده عملگه آشیریلگن.
پولیسنینگ معلوم قیلیشیچه، «ترورچیلر» اوشبو منطقهدهگی تینچلیک کمیتهسی ادارهسیگه هجوم قیلگن و اۉق المشینووی چاغیده کمیتهنینگ یېتّی اعضاسی اۉلدیریلگن.
پولیسنینگ ایتیشیچه، هلاک بۉلگنلر و یرهلنگنلر بنوی محلي شفاخانهسیگه کۉچیریلگن.
حاضرگچه هېچ بیر شخص یاکه گروه بو هجوم اوچون جوابگرلیکنی اۉز ذمّهسیگه آلمهگن.
طالباننینگ افغانستانده حاکمیتنی قَیته اېگهلهگنیدن بېری، افغانستان بیلن چېگرهداش خیبر پختونخوا ایالتیده عصیانچی هجوملری کۉپهیگن.
پاکستان رسميلرینینگ ایتیشیچه، پاکستان طالبان حرکتی (تیتیپی) افغانستان حدودیدن فایدهلنیب بو هجوملرنی عملگه آشیرماقده.
عینِ پیتده طالبان و پاکستان اۉرتهسیدهگی مناسبتلر تیتیپینینگ افغانستان توپراغیده موجودلیگی و چېگره مسألهلری سبب ضدیتلی بۉلیب توریبدی. ایکّی مملکت چېگرهلری بیر آیدن کۉپراق وقت دوامیده یاپیق قالماقده و ایکّی تامانلهمه تجارت تۉختهگن.
