طالبان رهبری هبتالله آخوندزاده، دین عالِملریدن اۉز فرمانلریگه عمل قیلیشنی، اولرنی خلقگه یېتکزیش و توشونتیریشنی سۉرهگن.
طالبان سۉزلاوچیسینینگ اۉرین باسری حمدالله فطرت، بوگون (چهارشنبه ۲۸ عقرب) بیلدیرگن بیاناتیده، آخوندزاده بو سۉزلرنی قندهارده «افغانستان فقه مجلسلری اعضالری و عالِملری» اوچون ایکّی کونلیک سمینار یکونیده بیلدیرگن تیلگه آلگن دېدی.
آخوندزاده، «عالِملر و مسووللر اوّلا اسلام امیرلیگی (طالبان) تامانیدن چیقریلگن فرمانلرنی اۉزلریگه تطبیق اېتسینلر، سۉنگره اونی خلقگه توشونتیرسینلر. فرمان و قانونلرنی خلقگه یېتکزسینلر، آدملرنی فرمانلردن خبردار قیلسینلر و اونینگ قدر- قیمتی همده اهمیتینی بیان اېتسینل دېب تیلگه آلگن.
هبتالله آخوندزاده عالِملردن بیر-بیرلری بیلن اختلاف قیلمسلیکنی، خلق اۉرتهسیدهگی نزاعلرنی برطرف اېتیشگه حرکت قیلیشنی، امر به معروف و نهی از منکرگه رعایه قیلیشنی همده خلق و مسووللرنی اصلاح قیلیشنی سۉرهگن.
او، شونینگدېک، فقه علمینی «برچه علملرنینگ اېنگ یخشیسی» دېب اتب، بو علم «اللهنینگ کتابی و پیغمبر سنتینینگ خلاصهسی» اېکنینی و حلال-حرامنی بېلگیلب بېریشینی تأکیدلهگن.
طالبان رهبری گروهنینگ افغانستاننی قَیته اېگهللشیدن بېری یوزلب فرمانلر چیقرگن. اولرنینگ اکثریتیده مملکت یشاوچیلرینینگ شخصي حیاتی و اجتماعي فعالیتیگه قطعی چېکلاولر جاري قیلینگن.
بو فرمانلرگه کۉره، عیاللرنینگ تعلیمی و ایشی منع قیلینگن، اولرنینگ جمعیتدهگی اشتراکی کېسکین چېکلنگن.
