بیرلشگن ملتلر تشکیلاتی ترقیات دستورینینگ معلوم قیلیشیچه، جاپان افغانستان عیاللرینینگ تورموش درجهسینی یخشیلش و اولرنینگ اقتصادي امکانیتلرینی قۉللب-قوّتلش اوچون۸۶۴ میلیون ین (۵.۶ میلیون دالر) یاردم اجرهتگن.
اوشبو اداره سهشنبه،۲۷ عقرب کونی اعلان قیلگن بیاناتیده قید اېتیشیچه، بو بارهده جاپاننینگ کابلدهگی اېلچیسی کنیچی ماساموتو و بیرلشگن ملتلر تشکیلاتی ترقیات دستورینینگ افغانستاندهگی نمایندهسی استیفن رودریگیزاۉرتهسیده کېلیشوو امضالنگن.
تشکیلاتنینگ معلوماتیگه کۉره، اوشبو یاردم بیلن «چېگره منطقهلریده اقتصادي فعالیتنی ترغیب قیلیش آرقهلی عیاللرنینگ تورموش درجهسینی یخشیلش» ناملی ایکّی ییللیک لایحه باشلنهدی.
تشکیلاتنینگ ایتیشیچه، بو لایحه آرقهلی۷۳ته کیچیک لایحه عملگه آشیریلهدی و اولر آرقهلی عیاللر باشچیلیگیدهگی ایکّی مینگ ۱۰۰ته کیچیک و اۉرته تجارت اوچون جماعهگه اساسلنگن ایشلب چیقریش آستقورمه توزیلمهسی، مالیوي منبعلر و بازارلرگه اېریشیشنی یخشیلش رېجهلشتیریلگن. بو اېسه محلي اقتصادنینگ رواجلنیشیگه یاردم بېرهدی.
جاپاننینگ کابلدهگی اېلچیسی کنیچی ماساموتو، جاپان افغانستان خلقی، اینیقسه عیاللرنی اقتصادي مستقللیککه اېریشیشی و اولرنینگ انساني قدر- قیمتینی تأمینلش یۉلیده قۉللب-قوّتلهیدی دېدی.
اونینگ قۉشیمچه قیلیشیچه، مذکور لایحه عیاللر اوچون خوفسیز و ثمرهلی امکانیتلر یرهتیب، اولرنینگ اۉزلری و عایلهلرینی قۉللب-قوّتلشیگه یاردم بېرهدی.
بیرلشگن ملتلر تشکیلاتی ترقیات دستوری نمایندهسی استیفن رودریگیز اېسه شوندهی دېگن: اوشبو لایحه ایلگری عملگه آشیریلگن خصوصي سکتورده عیاللرنینگ اقتصادي فعالیتینی کوچهیتیریش لایحهسی نینگ دوامیدیر و او، عیاللر تجارتیگه سرمایه کیریتیش افغانستاننینگ رونقی اوچون ضرورلیگینی اثباتلهگنینی تأکیدلهگن.
تشکیلاتنینگ معلوم قیلیشیچه، بو لایحه «فوقالعاده رواجلنیش تشبثلری اوچون حدودي یاندشوو» دېب ناملنگن کېنگراق دستور دایرهسیده عملگه آشیریلهدی. لایحه بوتون افغانستان بۉیلب جماعهلرنینگ برقرارلیگینی آشیریش، ایش اۉرینلری یرهتیش و اقتصادي اۉسیشنی قۉللب-قوّتلشگه خدمت قیلهدی. اوشبو جریاننینگ مرکزیده عیاللرنی کوچهیتیریش تورهدی.
بو آرهده، طالبلر حاکمیتنی قَیته اېگهلهگنیدن بېری افغانستان عیاللرینینگ اقتصادي و اجتماعي فعالیتیگه کېنگ کۉلملی چېکلاولر جاري اېتگن. اولر عیاللرنینگ دولت ادارهلریده، محلي و خلق ارا نادولت تشکیلاتلرده ایشلشینی منع قیلیب، عیاللر باشقرهدیگن بیر قطار تجارتلرنی یاپیب قۉیدی.
