ننگرهاردهگی محلی منبعلرنینگ ایتیشیچه، تورخم اۉتیش یۉلی یاپیق بۉلیشیگه قرهمهی، پاکستانلیک تجارلر بعضی طالبان رسميلری بیلن کېلیشگن حالده محصولاتلرنی ناقانوني روشده افغانستانگه آلیب کیریشگه سعی وحرکت قیلهدیلر.
پاکستاننینگ ینگی میوهلری قَیتیب کېلهیاتگن مهاجرلر ترانسپورت واسطهلریده آرقهلی آلیب اۉتیلهیاتگنینی بېللی قیلدی بیر منبع.
ننگرهاردهگی محلي طالبان رسميلری هم پاکستاندن میوه و بلیقنینگ ناقانوني آلیب اۉتیلیشینی تصدیقلهگن و یوکلرنینگ مصادره قیلینگنینی بیلدیرگن.
آتی آشکار قیلمسلیکنی سۉرهگن بیر تجارنینگ اطلاعات روزگه ایتیشیچه، طالبان پاکستاندن محصولات وارد قیلیشنی منبع قیلگن بۉلسه-ده، تورخمده پاکستانلیک تجارلر بعضی محلي طالبان رسميلری بیلن کېلیشگن حالده تازه میوهلرنی آلیب کیریشنینگ تورلی تاکیتیکلریدن فایدهلنماقده.
کۉپچیلیک تازه موهلر طالبان بیلن کېلیشگن حالده قَیتیب کېلهیاتگن مهاجرلر ترانسپورتیده جایلشتیریلهدی و کېین افغانستان بازارلریگه یېتکزیلهدی دېب قۉشیمچه قیلدی.
منبع، «بیزنینگ شکایتیمیز شوکی، تورخمده افغانستاننینگ تازه میوه و سبزواتلری چیریب کېتماقده، تجارلر میلیونلب دالر ضرر کۉردی. بیز اۉز تازه مېوهلریمیزنی پاکستانگه صادر قیلیشگه رخصتیمیز یۉق، لېکن پاکستاننینگ تازه میوهلری ینه رخصت اېتیلماقده؛ بو عدالتسیز. بیر آیدن آشدی، یوزلب یوک موترلری تازه میوهلر بیلن شو یېرده تۉختهب توریبدی. بو معما حل قیلینیشی کېرهک.» دېدی.
اۉز آتی گزارشده ایتیلمسلیگینی سۉرهگن باشقه بیر تجار هم، پاکستان محصولاتلری، خصوصاً کیله و نارنج، تورلی بهانهلر بیلن تورخم آرقهلی افغانستانگه قاچاق قیلینماقده دېب اظهار قیلدی.
اونینگ فکریچه، محلي طالبان رسميلری بو ایشگه ارهلشگن و بو پول عوضیگه عملگه آشیریلهدی.
ننگرهاردهگی طالبان مدنیت و اخبارات باشقرمهسی معلوماتلری بۉییچه آمری قوریشي بدلون هم، یقینده تورخم آرقهلی پاکستاننینگ تازه میوهلری تورلی یۉللر بیلن آلیب اۉتیلگنینی اعتراف قیلدی.
اونینگ ایتیشیچه، یقینده بو ایش بیلن باغلیق بیر نېچه کیشی اوشلنگن و اوشلنگن شخصلر اوستیده حقیقي تشکیلاتچیلرنی انیقلش بۉییچه تېرگاو باشلنگن.
ننگرهاردهگی طالباننینگ اېکینچیلیک، سوغاریش و چارواچیلیک ادارهسی نمایندهسی اجمل صبحانی، تورخمدهگی حیوانلرنی قرنطین قیلووچی خادملر پاکستاندن آلیب کیریلگن۵۰۰ کیلوگرام بلیق مصادر قیلینگنینی تصدیقلهدی.
اونینگ سۉزلریگه کۉره، اوشبو بلیقلر بوگون، (۲۷ عقرب) کونی تورخمده مصادره قیلینگن و گۉشتی قۉشمه کمیسیون حضوریده دفن اېتیلگن.
افغانستان و پاکستان اۉرتهسیدهگی صادرات و واردات منبع اېتیلگندن سۉنگ، هېچ کیمگه پاکستاندن حیواني و اۉسیملیک محصولاتلرینی مملکتگه آلیب کیریشگه رخصت بېریلمهیدی تاکیدلنهدی.
بیرینچی کونلردن بیری، طالبان رسميلری تورخم آرقهلی پاکستاننینگ دارولر و تازه میوهلرینی ناقانوني آلیب کیریشنی توختهتگنینی معلوم قیلگن.
تورخم چېگرهسی بیر آیدن آرتیق وقت دوامیده سوداگه یاپیق بۉلیب، ایکّی تامان تجارلریگه میلیونلب دالر ضرر یېتکزدی.
طالبان افغانستان تجارلریگه اۉز حساب-کتابلرینی پاکستانده یاپیش اوچون اوچ آی مدت بېریب، اۉز سودالرینی باشقه مملکتلر بیلن کېنگهیتیریشنی توصیه قیلگن.
