طالبان تشقی ایشلر تاجیکستان هیاتی کابلگه سفر دوامیده طالباننینگ تشقی ایشلر وزیری امیرخان متقي بیلن اقتصادي علاقهلر و همکارلیکنی مستحکملش و کېنگهیتیریش مسألهلریده صحبت قیلگنینی معلوم قیلدی.
طالبلر تشقی ایشلر وزیرلیگی سۉزلاوچیسینینگ اۉرین باسری ضیاءاحمد تکل، بوگون (دوشنبه، ۲۶ عقرب) اۉزینینگ بیاناتیده، تاجیکستان هیاتی تورلی دولت ادارهلریدن تشکیل تاپگن بۉلیب، تاجیکستان مخصوص وکیلی رهبرلیگیده کابلگه کېلگن.
امیرخان متقي اوشبو هیات بیلن اوچرهشووده طالبان تاجیکستان بیلن یخشی قۉشنیچیلیک و دۉستانه علاقهلرنی رواجلنتیریشنی مقصد قیلگنینی، بو علاقهلر تورلی ساحهلرده کېنگهییب بارهیاتگنینی ایتگن.
متقي،«کېلهجکده ایکّی ایناغه و قۉشنی دولت اۉرتهسیدهگی علاقهلرده سېزیلرلی یوتوقلرنی کۉریشیمیزگه امید قیلهمیز» دېب قۉشیمچه قیلگن.
ضیاءاحمد تکل، نینگ قۉشیمچه قیلیشیچه، تاجیکستان هیاتی هم طالبان بیلن علاقهلرنی ینه-ده مستحکملش بارهسیده ایشانچ بیلدیرگن و «افغانستان و تاجیکستان تورلی ساحهلرده یقیندن همکارلیک قیلیشی ممکن» دېگن.
تکلنینگ ایتیشیچه، طالبان و تاجیکستان رسميلری بوندهی اوچرهشوولر و سفرلر دوام اېتیشینی حقیده علیحده تأکیدلهگن.
تاجیکستان افغانستاننینگ شمالي قۉشنیسی بۉلیب، حاضرگه قدَر طالبان حکومتینی رسماً تن آلمهگن و بو گروه بیلن یقین علاقهگه اېگه بۉلمهگن.
افغانستاننینگ دوشنبه شهریدهگی اېلچیخانهسی حاضرگه قدَر سابق حکومت اېلچیسی نظارتیده.
تاجیکستان طالبانگه قرشی قرشیلیک حرکتی و باشقه مخالف گروهلر نینگ، جملهدن «افغانستان ملي مقاومت جبههسی» نینگ دفترینی جایلشتیرگن.
بو مملکت شمالي افغانستانده ترورچی گروهلر و مخدر مادّهلر قاچاقی فعالیتی بۉییچه دایمي خواطر بیلدیرهدی.
