ایران پارلمان اعضاسی نصرالله پژمانفر، افغانستاندهگی تۉغانلردن مشهد اوچون سوونی آقیزیشنی طلب قیلدی.
او ایرنا اخبارات آژانسیگه بېرگن صحبتیده افغانستاندهگی تۉغانلردن مشهد ایچیملیک سووینی تأمینلش مقصدیده سوو آقیزیش مسألهسی نینگ ایران جمهور رییسی بیرینچی اۉرینباسری بیلن یازیشمهلر آرقهلی کوزهتیلگنینی و طلب قیلینگنینی ایتدی.
او، ایران جمهور رییسی بیرینچی اۉرینباسریدن افغانستان بیلن ضرور موافقلیکنی تأمینلشنی وقتی-وقتی بیلن عملگه آشیریشنی سۉرهگنینی بیلدیردی و هریرود نینگ یوقاری آقیمیدهگی تۉغانلردن قیش موسمیده کمیده ۲۰۰ میلیون متر مکعب سوونی تۉغانگه آقیزیشنی طلب قیلگن.
اونینگ سۉزلریگه کۉره، ۱۴۰۳-۱۴۰۴ سوو ییلیده خراسان رضوی ولایتیده یاغینگرچیلیک کمهیگن و حاضرده اوشبو ولایتدهگی تۉغان ذخیرهلری مینیمال درجهگه توشگن.
او شونینگدېک، مشهد ایچیملیک سووینی تأمینلاوچی اېنگ مهم تۉغان بۉلگن «دوستی» تۉغانیده فقط۳۴ میلیون متر مکعب سوو موجود و بو حجم نینگ اوچ فایزیدن کمینی تشکیل قیلهدی دېگن.
ایران رسميسینینگ تأکیدلشیچه، حاضرگی شرایطده جاري ییل نینگ قوس آییده «دوستی» تۉغانیدهگی سوو یېترلی درجهگه یېتمهی قالیشی و مشهد شهری کېلگوسی آیلر، حتی قیش فصلیده هم، ایچیملیک سووی یېتیشمسلیگی بیلن دوچ کېلیشی تخمین قیلینماقده.
«دوستی» تۉغانی ایران و تورکمنستان چېگرهسیده، هریرود دریاسی اوستیده جایلشگن. اوشبو تۉغان مشهد ایچیملیک سووینی و ایکّی مملکتنینگ زراعتی اوچون سوو تأمیناتی مقصدیده قوریلگن.
هریرود دریاسی افغانستان نینگ مرکزي تاغلریدن باشلنهدی، افغانستان و ایران چېگرهسیدن اۉتهدی و تورکمنستان نینگ قارهقوم چۉلیگه قوییلهدی.
حاضرگه قدَر افغانستان نینگ هرات ولایتیده هریرود دریاسیده ایکّی سوو تۉغانی قوریلگن.
طالباننینگ انرژی و سوو وزیرلیگی یقینده سلما تۉغانی اېکینچیلیک اوچون سوونی آقیزگنینی اعلان قیلدی. ایران رسميلری اوشبو سوو «دوستی» تۉغانیگه یېتیب باریشینی امید قیلگن اېدی.
