بیرلشگن ملتلر تشکیلاتینینگ ترقیات برنامهسی، اقلیم اۉزگریشی و اونگه باغلیق حادثهلر هر ییلی افغانستانده۲۰۰ مینگ کیشیگه تأثیر کۉرسهتهدی دېگن.
اوشبو تشکیلات بوگون (یکشنبه، ۲۵ عقرب) بیلدیرگن گزارشیده افغانستان هوانی ایسیتیلیشیده اېنگ کم حصه قۉشگن دولتلردن بیری بۉلسه-ده، اونینگ اېنگ آغیر خرجتلرینی اۉز ذمّهسیگه آلهدی دېب یازگن.
بیرلشگن ملتلر تشکلاتی ترقیات لایحهسینینگ قۉشیمچه قیلیشیچه، اقلیم اۉزگریشی اېکینچیلیک حاصلینینگ کمهییشیگه، طبيعي آفتلرنینگ کوچهییشیگه آلیب کېلماقده و بو خلقنینگ حیاتی و تیریکچیلیگیگه تهدید سالماقده.
اوشبو تشکیلات نینگ گزارشیگه کۉره، ۱۹۵۰-ییلدن بېری افغانستانده هوا نینگ حرارتی تخمیناً ۱.۸درجه سانتی گرادگه کۉتریلگن، بو اېسه تۉستدن سېل، قورغاقچیلیک، قار کۉچیشی و دۉل یاغیشی کبی حادثهلرگه سبب بۉلگن و حاضر هر ییلی۲۰۰ مینگ کیشینینگ حیاتیگه تأثیر کۉرستماقده.
بیرلشگن ملتلر تشکیلاتی ترقیات لایحهسی، افغانستاندهگی اوزاق دوام اېتگن قورغاقچیلیکلر یامغیرنینگ کمهییشی نتیجهسیده یوزهگه کېلماقده، شونینگدېک، یازگی موزلرنینگ تېزراق اېریشی هلاکتلی سېللرگه سبب بۉلهدی دېیه قۉشیمچه قیلگن.
تشکیلاتنینگ تأکیدلشیچه، ییللر دوامیده اوروش و سرمایه یېتیشماوچیلیگی سببلی افغانستاننینگ کۉپلب جمعیتلری هنوزگچه بو شرایطلرگه تیار اېمس.
بیرلشگن ملتلر تشکیلاتینینگ ترقیات دستوری اقلیم اۉزگریشیگه ماسلشووچی دستورلرنی ایشگه سالیش و قَیته تیکلنهدیگن انرژیدن فایدهلنیش آرقهلی افغانستان خلقیگه اقلیم اۉزگریشیگه قرشی کورهشیشده یاردم بېریشینی و اولرنینگ قورغاقچیلیک و باشقه طبيعي آفتلرگه برداشینی آشیریشگه حرکت قیلیشینی بیلدیرگن.
شو بیلن بیرگه، بوگونلر بیرلشگن ملتلر تشکیلاتینینگ اۉتیزییللیک اقلیم کنفراسسی (کوپ ۳۰)برازیلدهگی ییغیلیشیده اۉتکزیلماقده، لېکن افغانستاندن هېچ قندهی وکیل اشتراک اېتمهیپتی.
بیرلشگن ملتلر تشکیلاتی طالبلرنی ایچکی و خلقارا درجهده مشروعیت گه اېگه اېمسلیگی سببلی اوشبو ییغیلیشگه تکلیف قیلمهگن.
