طالبلر تجارت و صناعت وزیری نورالدین عزیزی اقتصادي هیات باشچیلیگیده ایراننینگ سیستان و بلوچستان ولایتیگه سفر قیلگن. او هیرمند اولسواللیگیده ایران و افغانستان نینگ قۉشمه اقتصادي ییغیلیشیده اشتراک اېتگن.
ایرنا خبرگزارلیگی خبریگه کۉره، اوشبو ییغیلیشده ایکّی دولت اۉرتهسیدهگی تجارت علاقهلرینی رواجلنتیریش و سودا تۉسیقلرینی برطرف اېتیش یۉللری محاکمه قیلینگن.
سیستان و بلوچستان ولایتی حاکمی منصور بیجار، اېرکین منطقهلردن فایدهلهنیش، یۉل آستقورمهلریدن کېنگ فایدهلنیش بۉییچه کتّه قمراولی رېجهلشتیریش ایشلری عملگه آشیریلماقده دېگن.
او سیستانن اېرکین زونی و چابهار بندری افغانستان محصولاتلرینی ترانزیت و صادراتینی رواجلنتیریشنینگ اساسي مرکزلری صفتیده تنیشتیریب، شوندهی دېگن: «کامیونلر حرکتینی باشقریش و کونلیک اۉتیش ظرفیتینی ایکّی-اوچ مینگ تگه یېتکزیش رېجهلشتیریلگن. شونینگدېک، سیستان و بلوچستان نینگ یۉل و تېمیر یۉل آستقورمهسی تۉلیق فایدهلنیشگه تیار و اگر افغانستان تامانی همکارلیک قیلسه، تاور ترانزیتی تېزلیگی و صفتی سېزیلرلی درجهده آشهدی.»
سۉنگگی ییللرده، افغانستان و پاکستان سوداسی طالبان و اسلام آباد اۉرتهسیدهگی ترنگلیک سببلی تأثیرلنگن بۉلسه-ده، افغانستان و ایران اۉرتهسیدهگی تجارت آرتگن.
سۉنگپی پیتلرده پاکستان چېگرهلری یاپیلیشی مناسبتی بیلن، طالبان تجارلردن پاکستان یۉللریگه مقابل یۉللرنی تاپیشنی سۉرهگن. چابهار بندری شو مقابل یۉللردن بیری صفتیده کۉریلهدی.
طالبان رسميلرینینگ ایتیشیچه، افغانستان پاکستانگه باغلیقلیکنی کمهیتیریش مقصدیده ایران و مرکزي آسیا آرقهلی سودا یۉللریدن فایدهلنماقده.
طالبان تجارت و صناعت وزیرلیگی سۉزچیسی عبدالسلام جواد آخوندزاده رویترز خبرگزارلیگیگه، «سۉنگّی آلتی آی ایچیده ایران بیلن تجارت۱.۶میلیارد دالرگه یېتدی، بو پاکستان بیلن عملگه آشیریلگن۱.۱میلیارد دالردن کۉپ.»
اونینگ ایتیشیچه، چابهار بندریدن فایدهلنیش کېچیکیشلرنی کمهیتیرگن و سوداگرلرگه چېگرهلر یاپیلگنده ترانسپورت تۉختهمهیدی دېگن ایشانچ بېرگن.
ایران سیستان و بلوچستان ولایتینینگ حاکمی طالبان تجارت وزیری بیلن بۉلیب اۉتگن ییغیلیشده، چابهار بندرینینگ تجارت کېمهلرینی قبول قیلیش امکانیتی و عمان همده باشقه خلق ارا بندرلرگه کېمهلر یۉللرینی تشکیل اېتیش مسألهسینی محاکمه قیلگن. شونینگدېک، او شوندهی دېگن: «سیستان و بلوچستان ولایتی افغانستان سوداگرلری اوچون مخصوص چېگیرمهلر تقدیم اېتیشگه تیار، شونده ترانزیت خرجتلری کمهیهدی و اقتصادي همکارلیک دایمي و برقرار بۉلهدی.»
شونینگدېک، ایکّی دولت اۉرتهسیدهگی اقتصادي و تجارت ایشلرینی موافقلشتیریش اوچون نماینده تعیینلنهدی و برچه چېگره و تجارت لایحهلری تېز و ثمرهلی طرزده عملگه آشیریلهدی.
