هراتنینگ شیندند بېشتهله اولسواللیکلریده عمومي سوو تأمینات ادارهسینینگ معلوم قیلیشیچه، بو اولسواللیکلر اهالیسینینگ۹۰ فایزیدن آرتیغی تازه ایچیملیک سوویگه اېگه اېمس.
شیندند اولسواللیگی سوو تأمیناتی ادارهسی مدیری بسم الله عطایی، قورغاقچیلیک، یېر آستی سوولرینینگ کمهییشی و سوو تأمیناتی آستقورمهسینینگ یۉقلیگی سبب زاول، پشتکوه، کوهزور و زیرکوه اولسواللیکلرینینگ مینگلب اهالیسی اویلرینی تشلب، شیندند مرکزیگه کۉچیشگه مجبور بۉلگنلر دېدی.
اونینگ ایتیشیچه، بو اولسواللیکلرده بیر میلیوندن آرتیق اهالی یشهیدی و اولر نینگ قریب۹۰۰مینگ نفری تازه ایچیملیک سوویگه اېگه اېمس.
عطایی، بو منطقهلردهگی سوولرنینگ اکثریتی شۉر اېکنینی قۉشیمچه قیلدی.
اونینگ سۉزلریگه کۉره، فقط شیندند منطقهسینینگ تخمیناً۵۰کیلومتر اطرافی اهالیسی سوو تأمیناتی ترماغیگه اولنگن.
عایلهلر ایچیملیک سووی تاپیش اوچون اوزاق مصافهلرنی باسیب اۉتیشگه مجبور. بعضی حدودلرده اېسه قودوقلر بوتونلهی قوریب قالگن و آدملر کۉچیشگه مجبور بۉلگن.
محل یشاوچیلریدن بیری، «ییللر دوامیده قیشلاغیمیزده یشهدیک، اما حاضر قودوقده بیر تامچی هم سوو قالمهدی. هېچ بۉلمهسه سوو تاپیش اوچون اولسواللیکنینگ مرکزیگه کۉچیب کېلیشگه مجبور بۉلدیک» دېدی.
افغانستان بیر نېچه ییلدیرکی آغیر قورغاقچیلیکنی باشدن کچیرماقده.
خلق ارا تشکیلاتلرگه کۉره، قورغاقچیلیککه مایل ولایتلرده سوو منبعلرینینگ یرمی قوریگن و هر۱۰ کیشیدن۸ نفری افلاس سوودن فایدهلنهدی.
