منبعلر، هرات شهریدهگی شفاخانهده طالباننینگ «امر به معروف و نهي از منکر» ادارهسی بوگون (دوشنبه، ۱۹ عقرب) بیر عیال داکترنی بورقع کيمهگنی اوچون حبسگه آلینگنیدن خبر بېردی.
حبسگه آلینگن داکترنینگ آتی شبنم فضلي بۉلیب، او عمومي جراحلیک متخصصی حسابلنهدی.
اونینگ تورموش اۉرتاغی قدوس خطیبي فیسبوک صحیفهسیده یازیشیچه، طالبان کوچلری خاتینینی هرات ولایت مرکزي شفاخانهسی دروازهسی آلدیده قۉلگه آلگن. اونینگ قۉشیمچه قیلیشیچه، حاضر خاتینی تیلفون قۉنغیراقلریگه جواب بېرمهیپتی.
هرات شفاخانهسینینگ جراحلیک بۉلیمیدهگی منبعلر هم بو عیال داکترنینگ حبسگه آلینگنینی تصدیقلشگنلر. اَیریم منبعلرگه کۉره، ینه بیر نېچه عیال داکتر (نرس) هم قۉلگه آلینگن.
طالباننینگ هراتدهگی «امر به معروف» ادارهسی عیاللر اوچون بورقع کيیشنی مجبوري دېب اعلان قیلگن و عیاللر بورقعسیز دولت ادارهلریگه، جملهدن شفاخانهلرگه، کیریش حقوقیگه اېگه اېمسلیگینی بیلدیرگن.
محلي منبعلرنینگ ایتیشیچه، تیناوون بو اداره چېکلاونی بېکار قیلگنینی اعلان قیلگن اېدی، بیراق بوگون اېرتهلب ینه بیر نېچه عیال داکترنی حبسگه آلگن.
