ایران تشقی ایشلر وزیری عباس عراقچی پاکستان باش وزیرینینگ اۉرینباسری و تشقی ایشلر وزیری محمد اسحاق دار بیلن صحبتده کابل و اسلام آباد اۉرتهسیدهگی کېلیشماوچیلیکلرنی برطرف اېتیش همده تنگلیکنی کمهیتیریش اوچون مذاکرهنی دوام اېتتیریش ضرورلیگینی تأکیدلهدی و تهران بو بارهده همکارلیککه تیار اېکنینی بیلدیردی.
ایران تشقی ایشلر وزیرلیگی بوگون (یکشنبه، ۱۸ عقرب) عراقچی و اسحاق دار اۉرتهسیدهگی تلفون آرقهلی صحبت حقیده خبر بېردی و اولرنینگ ایکّی تامانلهمه مناسبتلر همده منطقوي و خلق ارا وضعیت بۉییچه فکر المشگنینی معلوم قیلدی.
وزیرلیک بیاناتیده ایتیلیشیچه،«عراقچی افغانستان و پاکستان اۉرتهسیدهگی موجود وضعیتدن خواطر بیلدیریب، ایکّی تامان اۉرتهسیدهگی مذاکرهنی منطقهدهگی تأثیرلی دولتلر همکارلیگیده دوام اېتتیریش ضرورلیگینی تأکیدلهدی و ایران اسلام جمهوریتی بو مقصد یۉلیده هر قندهی یاردمنی کۉرسهتیشگه تیارلیگینی اعلان قیلدی.»
بیاناتگه کۉره، پاکستان تشقی ایشلر وزیری اۉز نوبتیده مملکت و طالبان اۉرتهسیدهگی سۉنگگی مذاکرهلر نتیجهلری حقیده معلومات بېریب، منطقهده تینچلیک و برقرارلیکنی سقلش مهملیگینی اورغولهگن.
سۉنگگی مذاکرهلر تورکيهنینگ استانبول شهریده اۉتکزیلگن بۉلیب، جمعه کونی کېچقورون نتیجهسیز یکونلندی. هر ایکّی تامان بیر-بیرینی سبوتاژده عیبلهدی.
طالبان سۉزلاوچیسی ذبیحالله مجاهد: «پاکستان هیاتینینگ مسوولیتسیز مناسبتی و همکارلیک قیلمسلیگی طفیلی اسلامي امیرلیکنینگ اېزگو نیتی و واسطهچیلرنینگ سعی-حرکتلریگه قرهمهی، هېچ قندهی نتیجهگه اېریشیلمهدی.» دېگن.
بیراق پاکستان اخبارات و مدنیت وزیری عطاءالله طرار، «پاکستان اۉز موضعیده ثابت قالگن، افغانستان توپراغیدن کېلهیاتگن ترورچیلیکنی نظارت قیلیش مسوولیتی افغانستان ذمّهسیدهدیر» دېب قۉشیمچه قیلگن.
پاکستاننینگ ایتیشیچه، طالبان حاکمیتگه قَیتگنیدن سۉنگ، پاکستان طالبانی (تیتیپی) تامانیدن بو مملکتگه قرشی هجوملر کۉپهیگن. پاکستان طالباننی تیتیپیگه یاردم بېریشده عیبلهیدی. سۉنگگی تۉرت ییل دوامیده بو مسأله کابل و اسلام آباد اۉرتهسیدهگی کېسکینلیک نینگ اساسي سببلریدن بیری بۉلیب کېلماقده.
یقینده ایکّی تامان بیر نېچه کونلیک چېگره تۉقنهشوولریدن سۉنگ اۉت آچیشنی تۉختهتیش و مذاکرهلرنی باشلشگه کېلیشیب آلگن اېدی، بیراق حاضرچه مذاکرهلر هېچ قندهی نتیجه بېرمهگن.
