اطلاعات روز گزیتهسینینگ قۉلگه کیریتگن آوازلی پیامده طالبلر امربه معروف و نهی از منکر ادارهسی هرات ولایتیده شهر یۉلاوچی تاشوچی هیداوچیلریگه خاتین – قیزلرنی بورقعسیز موترگه میندیریشنی حتی اولر بیلن اېرکک محرمی بۉلسه هم منع قیلگنی معلوم قیلینهدی.
اوشبو آوازلی پیاملرنینگ بیریده، هرات ولایتی فارسی اولسواللیگی امربه معروف بۉلیمی باشلیغی مولوی خالد مذکور اولسواللیک دین عالملریدن جمعه نمازی وعظلریده بو مساله حقیده گپیریشنی سۉرهگن.
اونینگ سۉزلریگه کۉره، «امر به معروف خادملری بورقعسیز عیاللر اۉتیرگن موترلرنی تۉختهتهدی و اولرنینگ هرات شهریگه کیریشیگه رخصت بېرمهیدی.»
باشقه بیر آوازلی اودیو پیامده فارسی اولسواللیگینینگ امر به معروف خادمی عبدالحق غفوری اوشبو گروهنینگ باشقه خادملریگه مراجعه قیلیب، «اېندی هرات – فارسی یۉنهلیشیده ایشلهیاتگن هیچ بیر هیداوچی عیالنی بورقعسیز، حتی محرمی یانیده بۉلسه هم موترگه اۉتقیزیشگه حقلی اېمس» دېگن.
عین حالده او گروه اعضالریدن بو پیامنی برچه هیداوچیلر همده اهالیگه یېتکزیشنی طلب قیلگن.
غفورینینگ قۉشیمچه قیلیشیچه، امربه معروف و طالبلر کوچلری دوآبده تېکشیروو پسته اۉرنتگنلر. عیاللرنی بورقعسیز تشیگن هیداوچیلرنی او یېرده تۉختهتیلهدی، اونده هیچ قندهی بیر شکایت قیلیشگه حقلری یۉق دېب آگاهلنتیرگن.
سۉنگگی پیتلرده طالبان افغانستان غربی هرات ولایتیده عیاللر کيینیشیگه عاید چېکلاولرنی کوچهیتیرگن.
بیر نېچه هفته آلدین اولر بورقعسیز عیاللرنینگ دوکانلر و دولت ادارهلریگه کیریشینی هم منع قیلگن اېدی.
طالباننینگ «امر به معروف و نهي از منکر» قانونیگه کۉره، عیاللر بوتون تنهسینی یاپیب یوریشی شرط و اولرنینگ آوازی هم «عورت» دېب حسابلنهدی.
