طالبلر مطبوعات سۉزلاوچیسی ذبیحالله مجاهد، پاکستان تامانیدن قندهارنینگ اسپین بولدک اولسواللیگیگه اویوشتیریلگن هجوملرنی تصدیقلهدی. او، طالبان کوچلری «مذاکرهچییلرگه حرمت یوزهسیدن و تینچ اهالی نینگ تلفات کۉرمسلیگی اوچون» هېچ قندهی جواب قَیترمهگن دېدی.
او بوگون (پنجشنبه، ۱۵ عقرب) ایکس صحیفهسیده یازگن اظهارتیده، پاکستان بیلن اوچینچی باسقیچ مذاکرهلر استانبول شهریده باشلنگن بیر پیتده، افسوسکی، بوگون کېچقورون ینه پاکستان کوچلری قندهارنینگ سپین بولدک اولسواللیگیگه اۉت آچدیلر، بو اېسه خلق آرهسیده خواطر اویغاتدی دېگن.
طالبان سۉزلاوچیسینینگ قۉشیمچه قیلیشیچه، «آلدینگی اوچرهشووده اۉت آچیشنی تۉختهتیش و تجاوزلرنینگ آلدینی آلیش بارهسیده کېلیشووگه هم اېریشیلگن اېدی.»
آلدینراق قندهاردن آلینگن معلوماتلرگه کۉره، اسپین بولدکده طالبان جنگچیلری و پاکستان حربيلری اۉرتهسیده آتیشمه صادر بۉلگن. محلي منبعلر تخمیناً ساعت۵:۰۰اطرافیده بو حدودگه هاوان آتیلگنینی بیلدیرگن.
طالباننینگ اسپین بولدکدهگی امینه قوماندانلیگی، پاکستان حربيلرینینگ هاوان هجوملری نتیجهسیده بیر عیال و بیر اېرکک هلاک بۉلگن، ینه ایکّی کیشی جراحت آلگن دېب معلوم قیلگن اېدی. هجوملر اولسواللیک نینگ وردک و ست قیشلاقلریگه توشگن.
شونگه قرهمهی، مجاهد اۉز بیاناتیده قربانلر حقیده هېچ نرسه دېمهگن.
پاکستان حکومتی اېسه حاضرچه بو بارهده هېچ قندهی ایضاح بېرمهگن.
