دنیا ساغلیقنی سقلش تشکیلاتی، یقینده افغانستاننینگ شِمالیده یوز بېرگن یېر قیمیرلش عاقبتیده کمیده۲۶ کیشی، جملهدن۱۸ اېرکک و ۸ عیال هلاک بۉلگن، ینه۱۴۴۱کیشی آغیر و یېنگیل یرهلنگنینی بېللی قیلدی.
تشکیلات بوگون (سهشنبه، ۱۳ عقرب) اعلان قیلگن گزارشیده، زلزله عاقبتیده۳۴۰ ته اوی هم ویران بۉلگن.
گزارشده، هلاک بۉلگنلرنینگ ۱۳ کیشی سمنگانده، ۱۲ کیشی بلخده و ۱ کیشی سرپلده قید اېتیلگن. یرهدارلر اېسه۶۳۵ کیشی بلخده، ۴۱۸ کیشی سمنگانده، ۵۸ کیشی قندوزده، ۱۶ کیشی سرپلده،۱۴ کیشی بغلانده و ۳ کیشی جوزجانده اېکنلیگی بیلدیریلگن.
دنیا ساغلیقنی سقلش تشکیلاتیگه کۉره، سمنگان و بلخ ولایتلریدهگی بیر نېچته ساغلیقنی سقلش مرکزلری قسماً ضرر کۉرگن، بیراق فوقالعاده حالت عملیاتلری دوام اېتماقده و طبي همده قوتقروو جماعهلری جبرلنگنلرگه یاردم کۉرسهتیش اوچون تیار.
تشکیلات خلم اولسواللیگی تنگی تاشقورغانده رۉی بېرگن یېر کۉچیشینی یاردم یېتکزیشدهگی اساسي تۉسیقلردن بیری دېب اتهگن و بو حالت یرهلگنلرنی یېتکزیش جریانینی سېکینلشتیرگنینی معلوم قیلگن. شونینگدېک، بلخ ولایتینینگ مارمول اولسواللیگیگه کیریش هم یېر کۉچیشی سببلی اوزیلگن و بو شاشیلینچ یاردم یېتکزیشنی قیینلشتیرگن.
گزارشده قید اېتیلیشیچه، بلخ و سمنگان ولایتلریدهگی طبي مرکزلر کۉپراق طبي جهازلر و شاشیلینچ خدمت کۉرسهتووچی خادملرگه محتاج، شونینگ اوچون بو مرکزلرگه تېزکار یاردم ضرور.
دنیا ساغلیقنی سقلش تشیکیلاتی، تلفات کۉلمی و انسانپرورلیک احتیاجلرینی تۉلیق انیقلش اوچون ضررلنگن برچه اولسواللیکلرده کېنگ قمراولی مقایسه اۉتکزیلیشی لازملیگینی تاکیدلهگن. شونینگدېک، اوی-جایسیز قالگن عایلهلرگه یاردم کۉرسهتیش اوچون ملي و منطقوي درجهده موافقلشتیریلگن سعی-حرکتلر عملگه آشیریلیشی کېرهک.
۶.۳ ریشتر کوچگه اېگه بۉلگن مذکور یېر قیمیرلش یکشنبه کونی کېچهسی ساعت۱۲:۵۹مملکتنینگ شمالي ولایتلرینی لرزهگه کېلتیرگن. زلزلهنینگ مرکزی سمنگان ولایتی نینگ خلم تومنیده بۉلگن.
مذکور یېر قیمیرلش ایکّی آیچه اوّل شرقي ولایتلرده یوز بېرگن زلزلهدن کېین یوز بېردی. اۉشه زلزلهده قریب ایکّی مینگ کیشی هلاک بۉلگن و اوچ مینگدن آرتیق کیشی جراحت آلگن اېدی.
