پاکستان تشقی ایشلر وزیرلیگینینگ سۉزلاوچیسی طاهر اندرابي بوگون (جمعه، ۹ عقرب) مطبوعاتی بیر ییغینده ایتیشیچه، اسلامآباد طالبان بیلن کېسکینلیکنی کوچهیتیریشنی ایستهمهیدی و۶- نوامبرده باشلنیشی رېجهلشتیریلگن مذاکرهلرنینگ نوبتدهگی باسقیچیدن ایجابي نتیجه کوتماقده.
اکسپرس تربیون گزارشیگه کۉره، او ایتگندیک، پاکستان و طالبان اۉرتهسیدهگی مذاکرهلرنینگ ایکّینچی باسقیچی نېچه کون آلدین استانبولده واسطهچیلر اشتراکیده یکونلنگن.
اندرابينینگ قۉشیمچه قیلیشیچه «پاکستان۲۵-اکتبرده باشلنگن استانبول مذاکرهلریده یخشی کیفیت و ایجابي نیت بیلن اشتراک اېتدی»
اونینگ سۉزلریگه کۉره، مذاکرهلر ایکّی کون دوام اېتیشی رېجهلشتیریلگن بۉلسه-ده، تۉرت کون دوام اېتگن.
طالبان و پاکستان اۉرتهسیدهگی مذاکرهلر اۉتگن هفتهنینگ باشیده استانبولده باشلنگن، اما اوچ کونلیک تورغونلیکدن سۉنگ هېچ قندهی یوتوقسیز باشی بېرک کۉچهگه کیرگن.
تیناون اېرتهلب طالبان نظارتیدهگی یېتکرمه و پاکستان مطبوعاتی، مذاکرهلر تورکيه التماسیگه بناءً قَیته باشلنیشیدن خبر بېرگن اېدی.
تیناون کېچقورون تورکيه تشقی ایشلر وزیرلیگینینگ اعلان قیلگن بیاناتده ایتیلیشیچه، طالبان و پاکستان استانبول مذاکرهلریده اۉت آچیشنی اوزهیتیریش و ملاقاتنی دوام اېتتیریش بۉییچه کېلیشووگه اېریشگن.
شونینگدېک، ایکّی تامان کېلهسی ییلنینگ جون آییده ینه استانبولده اوچرهشیش و اۉت آچیشنی ثمرهلیراق عملگه آشیریش اصوللرینی محاکمه قیلیشگه کېلیشگن.
انداربینینگ سۉزلریگه کۉره، «پاکستان دشمنلیکنی ینه-ده کوچهیتیریش نیتیده اېمس، بیراق افغانستان طالبان رژیمیدن خلق ارا همجميت آلدیدهگی مجبوريتلرینی بجریشنی کوتهدی. اولر ترورچی تشکیلاتلرگه، جملهدن، فتنه خوارج و فتنه هندوستان دېب اتهلووچی گروهلرگه قرشی انیق و ایشانچلی چارهلر کۉریش آرقهلی پاکستاننینگ قانوني خوفسیزلیک تشویشلرینی برطرف اېتیشی کېرهک»
پاکستان حکومتی «فتنه خوارج» اتَمهسینی پاکستان طالبان حرکتی (تیتیپی) اوچون، «فتنه هندوستان» عبارهسینی اېسه بلوچ قوراللی گروهلرینی افادهلش اوچون ایشلهتهدی.
اسلام آباد بو گروهلر افغانستان حدودیده جایلشگن دېب تأکیدلهیدی. شونینگدیک اندرابي، «سۉنگّی تۉرت ییل دوامیده بیز افغانستان طالبانیدن اۉز حدودلریده فعالیت یوریتهیاتگن ترورچی گروهلرگه قرشی قطعي و ثمرهلی چارهلر کۉریشنی سۉرب کېلماقدهمیز.
بیز اولرنینگ یوقاری درجهدهگی رهبرلری افغانستان حدودیده جایلشگنلیگی حقیده ایشانچلی معلوماتلرنی بیر نېچه بار بهم کۉردیک. شونگه قرهمهی، ایلگری بېریلگن کۉپ مراتهبه وعدهلرگه قرهمهسدن، پاکستانده افغانستاندن کېلیب چیققن ترورچیلیک هجوملری سانی آرتدی»
او سۉزلرینینگ دوامیده،«طالباننینگ پاکستان نینگ قانوني خوفسیزلیک تشویشلریگه نسبتاً دایمي و تۉلیق اعتبارسیزلیگی چېگره تۉقنهشوولریگه سبب بۉلدی»
