بیرلشگن ملتلر تشکیلاتینینگ افغانستان بۉییچه مخصوص انسان حقوقلری گزارشگری ریچارد بنت مملکتلرنی «طالباننی عاديلشتیرمسلیککه» و انسان حقوقلری مسألهسیده قطعي موضع اېگهللشگه چقیردی.
اونینگ آگاهلنتیریشیچه، «افغانستان حاضر جنسي تېنگلیککه قرشی اېنگ کېسکین و تیزیملی هجومگه دوچ کېلماقده»
بنت تیناون (پنجشنبه، ۸ عقرب) اۉزینینگ افغانستاندهگی انسان حقوقلری حالتی حقیدهگی گزارشینی بیرلشگن ملتلر تشکیلاتی عمومی ییغیلیشیده تقدیم اېتدی.
او اۉزینینگ سۉزلریده، «وضعیت نینگ آغیرلیگینی آشیریب کۉرسهتیشنینگ علاجی یۉق. طالباننینگ تیزیملی روشده عیاللرگه نسبتاً قتیق سیاستینی توگهتیش و افغانستاندهگی کۉپلب انسان حقوقلری بحرانلریگه یېچیم تاپیش زودلیک بیلن خلقارا اعتبار و حرکتنی طلب قیلهدی دېدی. بو اېسه عملدهگی رهبرلرنی عاديلشتیریش بیلن اېمس»
بنت عیاللرنینگ برچه سیاسي و قرار قبول قیلیش جریانلریده فعال اشتراک اېتیشینینگ مهملیگینی تأکیدلهدی.
اونینگ سۉزلریگه کۉره، بشری بحران هم عیال خادملرگه نسبتاً کیریتیلگن چېکلاولر سببلی ینه-ده آغیرلشماقده. بنت شونینگدېک، طالبان تامانیدن بیرلشگن ملتلر تشکیلاتی عیال خادملرینینگ ایش جایلریگه چیقیشیگه قۉییلگن چېکلاولرنی «مثلسیز و مطلقا قبول قیلیب بۉلمهیدیگن» دېب اتهدی.
او، طالبان ناراضیلیکلرگه اعتبار بېرمهگنی سببلی، مملکتدهگی قومی، مذهبی و تیل آزچیلیکلری بیلن باغلیق ضدیتلر کوچهیماقده دېیه اورغولهگن.
شونینگدیک بنت «طالبان کمسیتووچی سیاستیگه برهم بېریشی و افغانستان کېلهجگی حقیده قرار قبول قیلیش جریانلریده جمعیتنینگ چېتگه سوریلگن گروهلریگه کېنگراق وکیللیکنی تأمینلشی لازملیگینی تیلگه آلدی»
مخصوص گزارشگر شونینگدېک، طالبان نینگ قطعي مفکورهسی اوزاق مدتلی خوفلرگه، اینیقسه ینگی اولاد نینگ رادیکاللشوویگه آلیب کېلیشینی تأکیدلهدی.
«بوگون افغانستانده یوز بېریب تورگن واقعهلر بو مملکت چېگرهلری بیلن چېکلنیب قالمهیدی. حرکتسیزلیکنینگ عاقبتلری کېنگراق دایرهده سېزیلهدی،» دېدی او.
