طالبان نظارتیدهگی افغانستان ملي تلویزیونینینگ خبر بېریشیچه، استانبولدهگی مذاکرهلر «پاکستان تامانی نینگ منطقسیز و اساسسیز طلبلر» سببلی هېچ قندهی نتیجه بېرمهگن.
تلویزیون خبریگه کۉره، پاکستان هیاتی طالباندن «افغانستان حدودیدن پاکستان ایچکریسیگه هېچ قندهی هجوم عملگه آشیریلمسلیگیگه کفالت بېریشنی» سۉرهگن.
اما طالبان هیاتی جوابا، « تحرک طالبان پاکستان (تیتیپی)» پاکستاننینگ ایچکی معماسی بۉلیب، او طالبان حاکمیتگه کېلیشیدن آلدین هم موجود بۉلگن و هنوز دوام اېتماقده دېگن.
خبرگه کۉره، مذاکرهلرده طالبان هیاتی افغانستان حدودی پاکستان یاکه باشقه مملکتلرگه قرشی ایشلهتیلمسلیگیگه صادق اېکنینی تأکیدلهگن.
شونینگدېک، طالبان پاکستاندن «داعش» و باشقه گروهلرگه افغانستان حدودیده «بوزغونچیلیک هجوملری» عملگه آشیریش اوچون اۉز یېرلریدن فایدهلنیشگه رخصت بېرمسلیکنی سۉرهگن.
طالبان، بوندن تشقری، پاکستاننی افغانستان هوا حدودینی بوزمسلیککه و تجارت بیلن سیاستنی ارهلشتیرمسلیککه چقیرگن.
بیرآز وقت اۉتیب، پاکستان مدافعه وزیری خواجه محمد آصف کېسکین بیانات بېریب، طالباننی «یۉق قیلینیش» بیلن تهدید قیلگن و شوندهی دېگن: «طالباننینگ توره بوره غارلریگه دُملرینی آیاقلری آرهسیگه قیسیب قاچیشی تماشا بۉلهدی.»
اونینگ سۉزلریگه کۉره، طالبان اۉزینینگ «باسیب آلینگن حکومتینی» سقلب قالیش و «اوروش اقتصادیاتینی» دوام اېتتیریش اوچون افغانستاننی ینه بیر اوروش تامان کۉر-کۉرانه یېتکلهماقده.
آصف «طالبان ریژیمیدهگی اوروشپرستلر، منطقهدهگی بېقرارلیکدن فایده کۉرهدیگنلر، بیزنینگ قطعیت و جسارتیمیزنی ناتۉغری توشونیشگن. اگر طالبان بیز بیلن اوروشماقچی بۉلسه، انشاالله، دنیا اولرنینگ تهدیدلری فقط ساخته نمایش اېکنینی کۉرهدی» دېب ایتگن
«بیز سیزنینگ خیانتلرینگیز و مسخرهلرینگیزگه اوزاق وقت چیدهدیک، اما اېندی بس. پاکستان ایچیده صادر بۉلهدیگن هر قندهی ترورچیلیک یاکه اۉز جانینی فدا قیلیش هجومی سیزگه بوندهی سرگذشتلرنینگ اچّیق تأمینی تهتدیرهدی. ایشانینگ، اگر خواهلهسنگیز، بیزنینگ ارادهمیز و قدرتیمیزنی اۉز هلاکتینگیز عوضیگه سینهب کۉرینگ»
تاریخا طالبان و پاکستان اۉرتهسیدهگی مناسبتلر یقین بۉلگن، حتا کۉپچیلیک افغانستانده طالباننی پاکستاننینگ واسطهچیلری دېب بیلگن.
بیراق سۉنگّی تۉرت ییل ایچیده ایکّی تامان اۉرتهسیدهگی علاقهلر کېسکین یامانلشگن و ترنگلیک کوچهیگن.
پاکستان طالباننی افغانستانده، خصوصاً تیتیپی کبی پاکستانلیک جنگریلرگه باشپناه بېریشده عیبلهیدی.
اسلام آباد بیر نېچه بار طالباندن تیتیپیگه قرشی چاره کۉریشنی سۉرهگن، اما طالبان بوندهی گروهلرنینگ افغانستانده موجودلیگینی انکار اېتگن.
پاکستان سۉنگّی ییللرده افغانستان حدودیده هوا هجوملری عملگه آشیریب، پاکستانلیک جنگریلرنی نشانگه آلگن. سۉنگّی هجوملر بیر هفتهلیک پاکستان حربيلری بیلن طالبان اۉرتهسیدهگی تۉقنهشوولرگه سبب بۉلگن.
کېینچهلیک قطر و تورکيه واسطهچیلیگیده ایکّی تامان دوحه شهریده اۉت آچیشنی تۉختهتیش بۉییچه کېلیشووگه اېریشگن، اما مذاکرهلرنینگ دوامي باسقیچی باشی بېرک کۉچهگه کیرگن.
