بیرلشگن ملتلر تشکیلاتینینگ افغانستاندهگی یاردم ادارهسی (یوناما) سۉنگّی اوچ آی ایچیده (جولای، اگست و سپتامبر) «طالباننینگ امر به معروف و نهی از منکر» ادارهسی تامانیدن ۴۵۱ ته ناقانوني حبسگه آلیش حالتی حجتلشتیریلگنینی ملعوم قیلدی.
یوناما انسان حقوقلری بۉلیمی نینگ بوگون (چهار شنبه ۶ عقرب ) اعلان قیلینگن ینگی گزارشیده شو دورده ۴۴ ته اېرکک و عیالگه نسبتاً یامان معامله حالتی قید اېتیلگن.
گزارشده ایتیلیشیچه، بو حبسلر و زۉراورلیکلر اساسا سقالنی آلیش یاکه قیسقرتیریش، غربانه ساچ تورمهگی، موسیقی تینگلش یاکه چلیش و حجاب قاعدهلریگه عمل قیلمسلیک کبی عیبلاولرگه باغلیق بۉلگن.
یونامانینگ معلوماتیگه کۉره، ۱- ۱۲ جولای آرهلیغیده طالباننینگ امر به معروف خادملری قندهار شهریده یوزلب اېرککلرنی سقاللرینی آلگنی یاکه قیسقرتیرگنی اوچون حبسگه آلگن.
اولر نینگ اَیریملری بیر نېچه ساعتدن اوچ کونگچه قماقده سقلنگن و سقال قۉییشگه وعده بېرگچ آزاد قیلینگن دیېیلهدی گزارشده.
شونینگدېک،۱۲ سپتامبر کونی کنر ولایتینینگ خاص کنر اولسواللیگیده طالبان اوچته سرتراشنی «دیني قاعدهلرنی بوزگنلیک»ده عیبلب محاکمه قیلگن، نتیجهده ایکّی کیشی اوچ آیگه، بیری اېسه بېش آی آزادلیکدن محروم قیلینگن.
یوناما، جولای و سپتامبر آیلریده طالبان کابل و هراتده عیاللرنی حجاب کيیشگه مجبور قیلیش اوچون مخصوص تېکشیرو اۉتکزگن و اۉنلب عیاللر همده قیزلرنی حبسگه آلگن.
۱۶دن۱۹ جولای کونلری کابلده پولیس و امر به معروف خادملری کمیده ۶۰ عیال و قیزنی حجاب فرمانینی بوزگنلیک اوچون ناقانوني روشده حبسگه آلگن. اولر بیر نېچه ساعتدن بیر کېچهگچه سقلنیب، قرینداشلری نینگ یازمه کفالتی بیلن آزاد قیلینگن.
شونینگدېک، ۱۵- ۱۹سپتامبر کونلری طالباننینگ هرات ولایتیدهگی جبریل منطقهسیده پُستهلر اۉرنهتیب، عیاللرگه چادر کيیش بویوریلگن. کېینراق، اولر بو بویروققه بۉیسونمهگن عیاللر گروهینی حبسگه آلگن، لېکن اېرکک قرینداشلری چادر آلیب کېلگچ، اولرنی قۉییب یوبارگنینی بېللی قیلگن.
یونامانینگ تأکیدلهشیچه، طالبان نینگ «امربه معروف و نهی از منکر» قانونی کۉپینچه اۉزباشیمچهلیک بیلن عملگه آشیریلماقده و بو قانوننینگ اجراسی افغانستان وطنداشلرینینگ کوندهلیک حیاتیگه چوقور تأثیر کۉرستماقده.
مذکور قانونگه کۉره، عیاللرنینگ آوازی «عورت» حسابلنهدی و اولرنینگ آوازی اویدن تشقریده اېشیتیلیشی منبع قیلینگن. شونینگدېک، اېرککلرنینگ تشقی کۉرینیشی، کییم-کېچهگی و ساچ-سقال اسلوبیگه هم قطعي چېکلاولر جاري اېتیلگن.
