پاکستان یېتکرمهلرینینگ خبر بېریشیچه، استانبولده پاکستان و طالبان اۉرتهسیدهگی ینگی مذاکرهلرنینگ اوچینچی کونی دوشنبه کونی کېچقورون هېچ قندهی یوتوقسیز یکونلنگن.
منبعلرگه تیهنیب خبر بېرگن جیو نیوز خبریگه کۉره، طالبان حلی هم پاکستاننینگ تروریزمگه قرشی طلبلرینی تۉلیق بجریشگه تیار اېمس.
ایشانچلی منبعلر نینگ سۉزلریگه کۉره، مذاکره چاغیده فکر کېلیشماوچیلیکلری یوزهگه کېلگن، چونکه پاکستان اۉز تکلیفلریده قطعي تورگن، افغانستان طالبانینینگ هیاتی اېسه کابل نینگ کۉرستمهلریگه بۉیسونگن.
منبعلرنینگ قۉشیمچه قیلیشیچه، واسطهچیلر هم پاکستاننینگ طلبلرینی منطقي و قانوني دېب حسابلهگن، حتا طالبان مذاکرهچیلرینینگ اۉزلری هم اسلام آبادنینگ تروریزمگه قرشی طلبلرینی قبول قیلیش تۉغری اېکنینی تن آلگن.
خوفسیزلیک منبعلرینینگ معلوم قیلیشیچه، طالبان هیاتی دوام اېتهیاتگن مذاکرهلر دوامیده کابلدن کۉرسهتمهلر آلیب تورگن و بیر نېچه بار طالبان بیلن مصلحتلشگن.
«کۉرینیشیدن بو هیات کابلنینگ نظارتی آستیده و شو نرسه مذاکرهلرنینگ آلدینگه سیلجیشینی سېکینلشتیرماقده.» دېیه قۉشیمچه قیلگن منبع.
منبعلر نینگ ایتیشیچه، پاکستان هر دایم اۉز طلبلرینی قبول قیلیش همه اوچون فایدهلی اېکنینی تأکیدلب کېلگن و بو فکرنی مېزبان دولتلر هم طالبان تامانیگه یېتکزیشگن.
شونگه قرهمهی، اولر کابلدن هېچ قندهی ایجابي جواب آلمهگنلیکلرینی، بو اېسه مذاکرهلرنینگ باشی بېرک کۉچهگه کیریشیگه سبب بۉلگنینی ایتیشگن.
جیو نیوز، کابلدهگی اَیریم کوچلر تورلیچه سیاسي یۉنهلیشلرنی کوزهتماقده دېگن. «پاکستان نینگ موضعی منطقي، قطعي و برقرار تینچلیک اوچون ضرور بۉلیب قالماقده.» دېب توشینتیرگن.
طالبان و پاکستان اۉرتهسیدهگی مذاکرهلر تورکيهده شنبه کونی باشلنگن اېدی.
اما طالبان نظارتیدهگی افغانستان ملي تلویزیونینینگ کېچه خبر بېریشیچه، طالبان و پاکستان هیاتلری استانبولده «کۉپچیلیک مسألهلرده» کېلیشووگه اېریشگن.
اوشبو تلویزیون خبریده ایتیلیشیچه، «بیر نېچته چېکلنگن مسألهلر» قالگن بۉلیب، اولر بۉییچه دوشنبه کونی (۵ عقرب) یکوني کېلیشووگه اېریشیلیشی کوتیلگن.
ملي تلویزیون خبریگه کۉره، مذاکرهلر یکونیده اۉت آچیشنی تۉختهتیشنی اوزهیتیریش، چېگره اۉتیش جایلرینی آچیش، محبوسلرنی آزاد قیلیش، نوبتدهگی ییغیلیشنینگ وقتی و جایینی بېلگیلش همده باشقه اَیریم مسألهلر بۉییچه قۉشمه بیانات اعلان قیلینیشی رېجهلشتیریلگن.
