هرات و باميان بیلیم یورتلریدهگی منبعلرنینگ معلوم قیلیشیچه، محصللرنینگ یاتاقخانه کارتلری سقالینی قیسقرتیرگنی یاکه بوتونلهی آلیب تشلهگنی اوچون آلیب قۉییلگن، اَیریملرینینگ اېسه بدل اعاشه حقوقی بېکار قیلینگن.
هرات بیلیم یورتیدهگی بیر منبع اطلاعات روزگه ایتیشیچه، چمه سی۵۰ نفر محصلدن یاتاقخانه کارتی آلیب قۉییلگن و اولر یاتاقخانهدن چیقریلیشی ممکن.
اونینگ سۉزلریگه کۉره، کیمنینگ سقالی یاکه کلاهسی بۉلمهسه، طعام بېریلمهیدی.ا
منبعنینگ قۉشیمچه قیلیشیچه، طالبان نمایندهلری هر کونی محصللرگه دعوت و ارشاد ییغیلیشلریده بیر ساعت قتنهشیشنی مجبوري قیلگن.
هرات بیلیم یورتینینگ بیر قنچه محصللری، طالباننینگ «امر به معروف و نهي از منکر» ادارهسی خادملری درسلرگه بېواسطه ارهلشیب، سقالی یۉق بۉلگن طلبهلرنی صنفدن هَیدهب چیقریشگه اولگورهدی دېگن.
باميان بیلیم یورتیدهگی بیر منبع هم سقالی یۉقلیگی سببلی اَیریم محصللرنینگ طعام پولی تۉختهتیلگنینی بیلدیرگن.
اونینگ ایتیشیچه، بعضی محصللر طبیعی سقالسیز بۉلیشهدی، بو اېسه اولر اوچون جدّي معماگه ایلنگن.
طالبان حاضرده بیلیم یورتلرده محصللرگه سقال قۉییش و کلاه کيیشنی مجبوري قیلگن. بو چېکلاولر مکتبلرده هم جاري اېتیلگن.
شونینگدېک، اولر اۉقوو دستورینی قَیته کۉریب چیقیب، دیني تعلیمگه اورغو بېریشماقده.
طالبان رهبری هبتالله آخوندزاده عالي تحصیلات وزیرلیگیگه دیني علمالر بیلن مصلحتلشیب ایشلش و محصللرنینگ اعتقادي، فکري و دیني تعلیمیگه علیحده اعتبار بېریش بۉییچه کۉرسهتمه بېرگن.
