پاکستان اوردوسینینگ معلوم قیلیشیچه، افغانستان بیلن چېگرهداش خیبر پختونخوا ایالتینینگ کرم و شمالي وزیرستان اولسواللیکلریده کېچگن تۉقنهشوولرده۵عسکر هلاک بۉلگن.
رسمي بیاناتگه کۉره، تۉقنهشوو تیناون کېچه، افغانستان حدودیدن جنگریلرنینگ چېگرهنی بوزیب کیریشگه اورینیشیدن سۉنگ باشلنگن.
اوردونینگ قۉشیمچه قیلیشیچه، شمالي وزیرستانده۱۵ نفر جنگری، جملهدن۴ نفر اۉزینی پارتلاوچی و کرمده۱۰ کیشی جنگری یۉق قیلینگن.
پاکستان اوردوسی جنگریلرنی «فتنهی خوارج» هندستان تامانیدن قۉللب-قوّتلنهیاتگن تحرک طالبان پاکستان اعضالری صفتیده تعریفلهگن.
بو تۉقنهشوو استانبولدهگی مذاکرهلر بیلن بیر وقتده صادر بۉلگنی تأکیدلنیب، طالبان نینگ اۉز حدودیدن کېلهیاتگن ترور تهدیدلریگه نسبتاً نیتلری شبهه آستیگه آلینماقده، دېییلهدی بیاناتده.
سۉنگّی ایکّی کوندن بېری طالبان و پاکستان هیئتلری استانبولده اۉت آچیشنی تۉختهتیش کېلیشووی تفصیلاتلری اوستیده مذاکره آلیب بارماقده.
اۉتگن هفته اېسه تامانلر قطرنینگ دوحه شهریده بۉلیب اۉتگن اوچرهشووده زودلیک بیلن اۉت آچیشنی تۉختهتیش تۉغریسیده کېلیشووگه اېریشگن اېدی.
