تیناون و بوگون لغمان، خوست، فاریاب و پروان ولایتلریده یوز بېرگن بیر نېچته ترافیک حادثهلری عاقبتیده کمیده ۱۱ کیشی هلاک بۉلگن، ینه ۷کیشی یرهلنگن.
طالباننینگ لغمان ولایتی امنیه قوماندانلیگی مطبوعات سۉزلاوچیسی یونس یوسفزي تیناون (جمعه ۲ عقرب) قرغهیی اولسواللیگینینگ کمرمشال و عزیزخان حدودلریده کابل– جلالآباد یۉلیده اوچته ترافیک حادثه یوز بېرگن دېدی.
اونینگ سۉزلریگه کۉره، بو حادثهلرده تۉرت کیشی، جملهدن بیر باله و بیر عیال هلاک بۉلگن، ینه یېتّی کیشی یرهلنگن.
طالبان نینگ خوست ولایتی امنیه قوماندانلیگی سۉزلاوچیسی طاهر احرار، نادرشاهکوت اولسواللیگینینگ نوی کوت منطقهسیده «هینو» روسوملی یوک موتری بیلن موترسایکل تۉقنهشووی نتیجهسیده موتورسایکلنینگ ایکّی یۉلاوچیسی هلاک بۉلگن دېب معلوم قیلدی.
باشقه تاماندن فاریاب ولایتی امنیه قوماندانلیگی تیناوون چهلگزی تومن بازاریده بیر ترافیک حادثهسی یوز بیرگن و اونده بیر کیشی قربان بۉلگنینی معلوم قیلدی.
بو حادثهده «کوماز» روسوملی یوک موتر موتورسایکل بیلن تۉقنهشگن و موترسیکل هیداوچیسی هلاک بۉلگن.
کېچه کېچقورون پروان ولایتیده هم بیر ترافیک حادثهسی نتیجهسیده تۉرت کیشی حیاتدن کۉز یومگن.
طالباننینگ پروان ولایتی امنیه قوماندانلیگینینگ معلوم قیلیشیچه، حادثه کېچه ساعت ۸:۳۰ ده ده روبات منطقهسیده یوز بېرگن.
معلوماتلرگه کۉره، هیداوچیسی عیال کرولا موتر چاریکار شهریدن کابل تامان کېتهیاتیب، یۉلدن چیقیب کېتگن و یۉل چېتیدهگی یوک موتریگه اوریلگن.
نتیجهده عیال هیداوچی، ایکّی باله و ینه بیر یۉلاوچی هلاک بۉلگن.
امنیه قوماندانلیک بو حادثه حاضرده یۉل ترافیک ادارهسی تامانیدن تېکشیریلهیاتگنینی بیلدیرگن.
تېزلیکنی آشیریش، یۉللرنینگ صفتسیزلیگی و یۉل بېلگیلرنینگ یۉقلیگی مملکتدهگی ترافیک حادثهلرینینگ اساسي سببلریدن سنهلهدی. بو کبی حادثهلر هر ییلی یوزلب انسانلرنینگ اۉلیمیگه سبب بۉلهدی.
