طالبان مطبوعات سۉزلاوچیسی ذبیحالله مجاهد، گروه نینگ ایچکی ایشلر وزیرلیگی اۉرینباسری باشچیلیگیدهگی بیر هیات پاکستان بیلن مذاکرهلرنی دوام اېتتیریش مقصدیده تورکيهگه سفر قیلگن دېدی.
مجاهد بوگون، (جمعه ۲ عقرب) ایکس اجتماعی صحیفهسیده تورکيهدهگی اوچرهشووده قالگن مسألهلر حقیده مذاکره آلیب باریلهدی دېیه معلوم قیلگن.
اوّلراق پاکستان رسميلری، طالبان و پاکستان هیاتلری اۉرتهسیدهگی مذاکرهلر ۲۵ اکتبر استانبولده بۉلیب اۉتیشینی معلوم قیلگن اېدی.
طالبان و پاکستان بیر هفتهلیک تۉقنهشوولردن سۉنگ، اۉتگن یکشنبه کونی قطر و تورکيه واسطهچیلیگیده دوحهده اۉتکزیلگن مذاکرهلرده آتیش کېسینگه اېریشگن اېدی.
مذکور کېلیشووگه کۉره، ایکّی تامان بیر- بیرینینگ حدودي دخلسیزلیگیگه حرمت بیلن قرهش و چېگرهلرده برقرار تینچلیک و خوفسیزلیکنی مستحکملش اوچون میکانیزملر یرهتیش مجبوريتینی آلگن.
پاکستان تامانی، پاکستانلیک جنگریلر، پاکستان تحریک طالبان (تیتیپی) جنگریلری افغانستانده باشپناه تاپگن و او یېردن پاکستانگه قرشی حرکت قیلگنی حقیده ادعا قیلیب کېلگن.
بیراق طالبان بو دعوالرنی رد اېتیب، افغانستان حدودی هېچ بیر دولت اوچون تهدید اېمس، دېیه تأکیدلهیدی.
ذبیحالله مجاهد، قطر و تورکيه واسطهچیلیگیده ایکّی تاماننینگ دعوالرینی کۉریب چیقیش و کېلیشوونی عملده تطبیق اېتیش اوچون قۉشمه میکانیزم توزیلهدی دېب تیلگه آلگن اېدی.
پاکستان تشقی ایشلر وزیری محمد اسحاقدار اېسه، مملکتی افغانستان حدودیدن کېلهیاتگن تروریزم تهدیدلریگه قرشی انیق و ایشانچلی نظارت میکانیزمینی یرهتیشنی اینتیقلیک بیلن کوتهیاتگنینی بیلدیرگن.
