افغانستانده طالبان مدافعه وزیرلیگی بو گروه بیلن پاکستان اۉرتهسیده امضالنگن اۉت آچیشنی تۉختهتیش بیتیمی حقیده معلومات بېریب، «بیر-بیریگه قرشی هجوملرنی قۉللب-قوّتلهمسلیک» بارهسیده کېلیشووگه اېریشیلگنی تصدیقلندی.
وزیرلیک بوگون (چهارشنبه، 30 میزان) بېرگن بیانایتده، «اوشبو کېلیشووده تۉلیق اۉت آچیشنی تۉختهتیش، اۉز ارا حرمت، خوفسیزلیک کوچلری، تینچ اهالی و انشااتلرگه هجوم قیلمسلیک، برچه مسألهلرنی ملاقات آرقهلی حل اېتیش همده بیر- بیریگه قرشی هجوملرنی قۉللب-قوّتلهمسلیک حقیده انیق یازیلگن»
طالبان مدافعه وزیرلیگینینگ قۉشیمچه قیلیشیچه، «بو موضوع تشقریدهگی هر قندهی بیانات حقیقي اېمس.»
بیاناتده، مدافعه وزیری محمد یعقوب مجاهد اۉت آچیشنی تۉختهتیش بۉییچه اۉتکزیلگن مطبوعات انجمنیده «باتفصیل توشونتیریشلر بېرگن» و بوندن باشقه «قۉشیمچه تفصیلاتلر موجود اېمس» دېب تیلگه آلگن.
بوندن ایلگری پاکستان مدافعه وزیری خواجه محمد آصف بو آتیش کېسین بیتیمینینگ تفصیلاتلری «مخفي» اېکنینی ایتگن و اولرنی آشکار اېته آلمهسلیگینی بیلدیرگن اېدی.
شو بیلن بیرگه او بیتیم اوچته اساسي بندنی اۉز ایچیگه آلگنینی تأکیدلهگن: «مهاجرلرنینگ قَیتیشی، پاکستان طالبان حرکتینی قۉللب-قوّتلهمسلیک و اۉت آچیشنی تۉختهتیش»
طالبان و پاکستان اۉرتهسیدهگی اۉت آچیشنی تۉختهتیش کېلیشووی، شونینگدېک قطر تشقی ایشلر وزیرلیگی همده طالبان سۉزلاوچیسینینگ بیاناتلری کېنگ بحثلرگه سبب بۉلدی.
قطر تشقی ایشلر وزیرلیگی اۉز بیاناتیده بو کېلیشوو «ایکّی برادر مملکت اۉرتهسیدهگی چېگرهده کېسکینلیکنی کمهیتیریشیگه» امید بیلدیردی.
شوندن سۉنگ تنقیدچیلر طالبان ینگی بیتیمده دیورند چیزیغینی افغانستان و پاکستان اۉرتهسیدهگی رسمي چېگره صفتیده تن آلگنینی یازدیلرو
بیراق قطر تشقی ایشلر وزیرلیگی کېینچهلیک بیاناتیدن «چېگره» سۉزینی آلیب تشلهدی، و طالبان مدافعه وزیری هم بو سۉز بیتیمده ایشلهتیلمهگنینی اظهار قیلدی.
طالبان مطبوعات سۉزلاوچیسی ذبیحالله مجاهدنینگ بیاناتی هم بحث-مناظرهلرگه سبب بۉلدی.
او اۉز سۉزلریده «هر ایکّی دولت بیر- بیریگه قرشی دشمنلیک حرکتلرینی عملگه آشیرمسلیککه و پاکستان حکومتیگه قرشی فعالیت یوریتهیاتگن گروهلرنینگ هجوملرینی قۉللب-قوّتلهمسلیککه قرار قیلدی دیب اورغولهگن
کۉپلب تنقیدچیلر بو جملهنی طالبان نینگ پاکستان طالبان حرکتینی (تیتیپی) قۉللب-قوّتلهگنی و اولرنی افغانستانده پناه بېرگنیگه اقرار بۉلیش دېب تلقین قیلیشدی.
بیراق مجاهد کېینراق بو اولرنینگ دایمي موضعی اېکنینی، اما بو فکر قۉشمه بیاناتده قید اېتیلمهگنینی توشونتیردی.
پاکستان تامانی اېسه بیر نېچه بار پاکستان طالبانی افغانستان حدودیدن فایدهلنگن حالده اۉز مملکتیده هجوملر اویوشتیرهیاتگنینی دعوا قیلگن.
پاکستان مدافعه وزیری خواجه محمد آصف هم آتیش کېسین بیتیمیدن کېین «اۉت آچیشنی تۉختهتیشنینگ دوام اېتیشی افغانستان حدودیدن پاکستانگه هجوم قیلهیاتگن جنگریلرنی جلولشگه باغلیق» اېکنینی ایتگن.
او رویترز خبر آژانسیگه بېرگن صحبتیده، پاکستان طالبانی «افغان طالبانی بیلن همکارلیکده هجوملر اویوشتیرماقده» دېب دعوا قیلگن.
طالبان اېسه ایلگری هم پاکستان طالبانینی قۉللب-قوّتلشنی رد اېتگن و پاکستان رسميلرینینگ عیبلاولرینی «اساسیز» دېب اتهگن.
