پاکستان مدافعه وزیری خواجه محمد آصف، پاکستان طالبان حرکتی (تیتیپی) بیلن هر قندهی مذاکره احتمالینی رد اېتیب، پاکستان فقط حاضر افغانستانده حاکمیتنی قۉلگه کیریتگن طالبان بیلن علاقه اۉرنهتگنینی تأکیدلهدی.
او جیو نیوز تلویزیونیگه بېرگن صحبتیده، «پاکستان نینگ افغانستان بیلن نارهسمي دیپلوماتیک علاقهلری موجود» دېب ایتدی.
آصف، «انیق اَیتماقچیمن بیز تیتیای (افغانستان طالبانی) بیلن مذاکره آلیب بارماقدهمیز. بیز هېچ قچان تیتیپی بیلن مذاکره قیلماقچی» اېمس میز دېب قۉشیمچه قیلدی.
دوحه شهریده پاکستان هیاتیگه رهبرلیک قیلگن آصفنینگ ایتیشیچه، افغانستان طالبانی بیلن صلح مذاکرهلری دۉستانه محیطده اۉتگن.
او قطر و تورکيهنینگ مهم واسطهچیلیک رۉلینی اعتراف اېتیب، «مذاکرهلر دوامیده هېچ بیر طرف تامانیدن اچّیقلیک کوزهتیلمهدی»، دېدی.
آصفنینگ معلوم قیلیشیچه، صلح بیتیمی لایحهسی اتیگی تۉرت پاراگرافدن عبارت بۉلگن، اجتماعي ترماقلرده ترقهلهیاتگن اوزون «حجت» اېسه ساخته دیر.
پاکستان مدافعه وزیری شونینگدېک، کېلیشوو بۉییچه باتفصیل محاکمه تورکيهده اۉتکزیلیشینی تیلگه آلدی.
او ایلگری طالبان و پاکستان اۉرتهسیدهگی صلحنی «مۉرت» دېب اتهگن بۉلسه-ده، اېندی بو فکرینی «احتیاطکارلیک بیلن ایجابي» دېب اۉزگرتیرگنینی بیلدیردی.
آصف دېدی: «امیدنی دایما سقلش کېرهک، اما یکوني خلاصه اوچون حلی اېرته».
او شونینگدېک، کېلیشوودن کېین افغانستانده «کۉپهییب بارهیاتگن آوازلر» حقیده آگاهلنتیریب، «کېلینگ، امید قیلهیلیککی، اولر (افغانستان) بو مسألهنی بیز بیلن یگانه دولت صفتیده حل اېتیشهدی،» دېدی.
او شونینگدېک، تیتیپی و هندستان نینگ «کېلیشوونی بوزیشگه» اورینیشلری ممکنلیگی حقیده آگاهلنتیردی.
طالبان و پاکستان بیر هفتهلیک تۉقنهشوو و ترنگلیکدن سۉنگ، یکشنبه تانگیده قطر و تورکيه واسطهچیلیگیده صلح بیتیمینی امضالهدیلر.
کېلیشووگه بناءً، ایکّی تامان بیر-بیری نینگ حدودي دخلسیزلیگینی حرمت قیلیشگه و چېگرهلرده برقرار تینچلیکنی تأمینلش اوچون میکانیزملر یرهتیشگه وعده بېریشدی.
پاکستان رسميلرینینگ ایتیشلریچه، تیتیپی جملهسیدن بۉلگن پاکستانلیک جنگری گروهلر افغانستان حدودیده فعالیت یوریتماقده. اسلام آباد بو گروهلرنی هندستان تامانیدن قۉللب-قوّتلنهیاتگن ترورچیلر دېب اتهیدی.
اما طالباننینگ مدافعه وزیری محمد یعقوب مجاهد بو دعوانی رد اېتیب، «پاکستانلیک جنگریلرنی ترورچی دېب بیلمهیمیز،» دېدی.
طالبان افغانستانده حاکمیتنی قۉلگه آلگن دستلبکی دورده، اۉشه پیتده عمران خان باشچیلیگیدهگی پاکستان حکومتی بیلن پاکستان طالبانی (تیتیپی) اۉرتهسیده واسطهچیلیک قیلگن اېدی. اۉشه پیتده صلح امضالنگن بۉلسه-ده، او اوزاققه چۉزیلمهدی و تیتیپی هجوملری پاکستانده ینه کوچهیدی.
طالبان اېسه پاکستانلیک جنگریلر نینگ افغانستانده موجودلیگینی انکار اېتیب، «تیتیپی اعضالری پاکستان ایچیده جایلشگن، شونینگ اوچون پاکستان حکومتی اولر بیلن اۉزی مذاکره آلیب باریشی کېرهک،» دېیه بیلدیرماقده.
