محلي منبعلرنینگ معلوم قیلیشیچه، پنجشیر ولایتی نینگ دره اولسواللیگیده طالبان ینه اوچ نفر سابق حربينی حبسگه آلگن.
منبعلرگه کۉره، محمد صالح، نصرالله و پیروز اسملی سابق حربيلر تیناوون (جمعه۲۹ جوزا) دره اولسواللیگینینگ عبداللهخیل درهسی منطقهسیده طالبان کوچلری تامانیدن قۉلگه آلینگن.
محلي منبعلر تیناوون هم طالبان استخباراتی اوشبو حدودده محمد سهراب و ذاکر اسملی ینه ایکّی سابق حربينی حبسگه آلگنی حقیده خبر بېرگن اېدی.
منبعلر اوّلگی ایکّی حربي نینگ حبسگه آلینیشی سببلرینی معلوم قیلمهگن. بیراق، کېینچهلیک قۉلگه آلینگن اوچ نفر سابق حربي «قورال سقلش» عیبلاوی بیلن حبس اېتیلگنی ایتیلماقده.
محلي اهالی نینگ تأکیدلشیچه، اوشبو شخصلر اوّلراق اۉز قوراللرینی طالبانگه تاپشیرگن و پنجشیرده عادي اهالی صفتیده یشب کېلهیاتگن اېدی.
طالبان نینگ پنجشیردهگی محلي رسميلری حاضرچه بو حبسلر یوزهسیدن ایضاح بېرمهگن.
طالبان افغانستانده حاکمیتنی قَیته اېگهلهگنیدن بویان سابق حربيلر و اوّلگی حکومت عملدارلرینی اۉزباشیمچهلیک بیلن حبسگه آلیشده منتظم عیبلنیب کېلماقده. شونینگدېک، گروه سابق حربيلر و دولت خدمتچیلریگه نسبتاً قییناقلر همده محکمهسیز قاتللیکلرنی عملگه آشیریشده هم عیبلنهدی. طالبان اېسه بو عیبلاولرنی رد اېتیب، اۉز رهبری تامانیدن اعلان قیلینگن عمومي عفو سیاستیگه عمل قیلهیاتگنینی تأکیدلب کېلهدی.
