قزاقستان باش وزیرینینگ اۉرین باسری همده اقتصاد وزیری سیریک ژومان گارین کابلگه سفری دوامیده طالبلر باش وزیری ملا محمد حسن آخوند بیلن اوچرهشیب، ایکّی تامانلهمه مناسبتلرنی بحث قیلدی.
طالبلر سۉزلاوچیسی اۉرین باسری حمدالله فطرت ترقهتگن بیاناتگه کۉره، اوچرهشوو بوگون (شنبه، ۳۰ جوزا) گُلخانه قصریده بۉلیب اۉتگن.
بیاناتده ایتیلیشیچه، ملا محمد حسن آخوند افغانستان و قازاقستاننی سیاسي، اقتصادي، دیني و مدني جهتدن کۉپلب عموميلیکلرگه اېگه بۉلگن ایکّی مسلمان دولت صفتیده تعریفلهگن.
سیریک ژومان گارین اېسه کابلگه تشریفیدن مقصد طالبان بیلن سیاسي و اقتصادي علاقهلرنی رواجلنتیریش همده مستحکملش اېکنینی بیلدیرگن. قزاقستان جمهور رییسی نامیدن ملا محمد حسن آخوندنی رسمي تشریف بیلن قازاقستانگه تکلیف قیلگن.
قازاقستان جمهور رییسی نینگ اۉرین باسری شونینگدېک، اۉزی بیلن افغانستانگه سکّیز واگون انسانپرورلیک یاردمی، جملهدن چادرلر، دارو-درمانلر و باشقه ضرور واسطهلرنی آلیب کېلگنینی معلوم قیلگن. بوندن تشقری، او کابلده «افغان-قزاق قۉشمه تجارت اتاقی»نی آچیشینی هم ایتگن.
طالبلر باش وزیری ایکّی تامان اۉرتهسیدهگی مناسبتلرده ایجابي اۉسیش کوزهتیلهیاتگنینی تأکیدلب، قازاقستان هیئتی تشریفی همکارلیکنی ینه-ده کېنگهیتیریشیگه امید بیلدیرگن.
او طالبان ادارهلریگه افغانستان و قازاقستان اۉرتهسیدهگی همکارلیک همده علاقهلرنی مستحکملش اوچون عملي چارهلر کۉریش بۉییچه تاپشیریق بېرگن.
ملا محمد حسن آخوند هم اۉز نوبتیده قازاقستان جمهور رییسی قاسم جومارت توقایف نی کابلگه تشریف بویوریشگه تکلیف قیلگن. سۉنگّی بېش ییل دوامیده طالبان و قازاقستان اۉرتهسیدهگی سیاسي همده اقتصادي علاقهلر سېزیلرلی درجهده کېنگهیگن. شو دورده ایکّی تامان رسميلری کابل و آستانه اۉرتهسیده بیر نېچه بار اۉزارا تشریفلر عملگه آشیرگن.
