پاکستان باش وزیری شهباز شریفنینگ معلوم قیلیشیچه، پاکستان سۉنگّی قریب اوچ ییل دوامیده ۲.۴ میلیون افغانستانلیک مهاجرنی مملکتدن چیقرگن.
شریف بو رقملرنی بوگون (شنبه،۳۰ جوزا) نشانلنهیاتگن جهان قاچقینلر کونی مناسبتی بیلن نشر قیلگن بیاناتیده کېلتیردی.
پاکستان باش وزیرینینگ ایتیشیچه، ۲۰۲۳-ییل سپتامبردن ۲۰۲۶-ییل جونیگچه بۉلگن دورده ۲.۴ میلیون افغانستانلیک مهاجر اۉز مملکتیگه قَیتگن.
اونینگ سۉزلریگه کۉره، بو کۉرستکیچ اختیاري روشده افغانستانگه قَیتگنلر همده پاکستان حکومتی تامانیدن مجبوري روشده دېپورت قیلینگنلرنینگ برچهسینی اۉز ایچیگه آلهدی.
شو بیلن بیرگه، شریف قاچقینلرنی حمایه قیلیش و قۉللب-قوّتلش مجبوريتیگه صادق اېکنینی تأکیدلهدی.
او شوندهی دېدی: «خوفسیزلیک انسان نینگ اساسي حقوقی دیر. ماجرالر، بېقرارلیک و باشقه بحرانلر سبب اۉز اویلرینی ترک اېتیشگه مجبور بۉلگن انسانلرنی حمایه قیلیش و قۉللب-قوّتلش خلقارا همجعیت نینگ عمومي مسوولیتیدیر.»
شریف نینگ تأکیدلشیچه، پاکستان ۱۹۷۹-ییلدن بویان، چېکلنگن منبعلرگه قرهمهی، میلیونلب افغانستانلیک مهاجرلرگه باشپناه، غمخۉرلیک و امکانیت یرهتیب کېلگن.
او خلقارا همجمعیت کۉچیریلگن و وطنسیز انسانلر اوچون «امید، تینچلیک و اویلریگه خوفسیز همده مناسب قَیتیش امکانیتینی» تأمینلشگه چقیریب، اولر نینگ «دایمي سورگون»گه محکوم بۉلیب قالمسلیگی کېرهکلیگینی ایتدی.
بیراق، طالبلر حاکمیتگه قَیتگنیدن کېین پاکستان افغانستانلیک مهاجرلرنی مجبوري دېپورت قیلیش سیاستینی سېزیلرلی درجهده کوچهیتیردی.
پاکستان ۲۰۲۳-ییلده یشش حجتلریگه اېگه بۉلمهگن مهاجرلرنی چیقریش جریانینی باشلهدی. کېینچهلیک ۲۰۲۴-ییلده افغانستانلیک مهاجرلرنینگ افغانستانلیکلرگه «ایسیسی» کارتلری، ۲۰۲۵-ییلده اېسه بیرلشگن ملتلر تشکیلاتی قاچقینلر بۉییچه عالي کمیسارلیگی تامانیدن بېریلگن (پیاوآر)کارتلری هم عمل قیلمهیدیگن حجتلر دېب اعلان قیلیندی.
جاري ییلده اېسه پاکستان افغانستان مهاجرلری اوچون ویزهلر بېریش و اولرنی اوزهیتیریش جریانینی هم تۉختهتدی.
نتیجهده، طالبلر قصاصیدن قۉرقیب و امریکا، کانادا، آسترلیا همده اروپا دولتلری کبی خوفسیز مملکتلرگه کۉچیب اۉتیش امیدیده پاکستانگه باشپناه ایزلب کېلگن مینگلب افغانلر حاضرده حبسگه آلینیشی و مجبوري دېپورت قیلینیشی خوفی آستیده قالماقده.
