لوکزامبورگده بیر قنچه افغانستانلیکلر طالبلر حکمرانلیگی آستیدهگی عیاللر و قیزلر بیلن بیردملیکده ناراضیلیک ییغیلیشی اۉتکزدی.
نمایشچیلر افغانستاندهگی عیاللر و قیزلر اېنگ اساسي انساني و مدنی حقوقلریدن، جملهدن تعلیم آلیش، ایشلش، اجتماعي و سیاسي حیاتده اشتراک اېتیش حقوقلریدن محروم قیلینگنینی تأکیدلشدی.
اولرنینگ سۉزلریگه کۉره، بو چېکلاولر نهفقط انسان حقوقلرینینگ عمومی اعتراف اېتیلگن تمایللری و انسان قدر-قیمتیگه ضد، بلکه عدالت، تېنگلیک همده انساني و دیني قدریتلرگه هم آچیق قرهمه-قرشی دیر.
نمایشچیلر عیاللر و قیزلرگه نسبتاً کوچهیگن سرکوبلرگه اعتبار قرهتیب، اۉزباشیمچهلیک بیلن حبسگه آلیشلر، زۉرآورلیک، تحقیرلش، کېنگ کۉلملی اجتماعي چېکلاولر و تینچ ناراضیلیکلرنی باستیریش مملکت نینگ کۉپلب حدودلریده قۉرقوو و خواطر محیطینی کوچهیتیرهیاتگنینی ایتیشدی.
اولر بو حالت دوام اېتسه، افغانستان کېلهجگی چوقور انساني، اجتماعي، مدني و اقتصادي بحرانلر بیلن یوزلشیشینی آگاهلنتیردی.
لوکزامبورگدهگی نمایشچیلر اروپا کمیسیونی تامانیدن طالباننی مذاکرهلرگه چقیریشیگه اشاره قیلیب، افغانستان کېلهجگی بۉییچه هېچ قندهی ملاقات یاکه قرار عیاللر حقوقلری، اولرنینگ طلبلری و فعال اشتراکیسیز عملگه آشیریلمسلیگی کېرهکلیگینی تأکیدلشدی.
اولر بیرلشگن ملتلر تشکیلاتی، اروپا اتفاقی، دولتلر و انسان حقوقلری تشکیلاتلریدن افغانستان عیاللرینی قۉللب-قوّتلش همده انسان حقوقلرینی بوزهیاتگنلرنی جوابگرلیککه تارتیش بۉییچه ثمرهلی و موافقلشتیریلگن چارهلر کۉریشنی طلب قیلیشدی.
سۉنگّی پیتلرده طالبلر تامانیدن عیاللرگه نسبتاً باسیم کوچهیگنی ایتیلماقده. گروه اَیریم شهرلرده، خصوصاً هراتده، عیاللرنی کيینیش قاعدهلریگه عمل قیلمهگنی اوچون حبسگه آلهیاتگنی معلوم.
هراتده عیاللرنینگ اۉزباشیمچهلیک بیلن حبسگه آلینیشی اهالی نینگ ناراضیلیگیگه سبب بۉلگن، بیراق طالبان بو ناراضیلیکلرنی هم کوچ بیلن باستیرگن. سۉنگّی کونلرده بیر قطار مملکتلرده یشاوچی افغانستانلیکلر هراتدهگی ناراضیلیکلرنی قۉللب-قوّتلب نمایشلر اۉتکزیشگن.
