محلي منبعلرنینگ معلوم قیلیشیچه، طالبلرنینگ امر به معروف و نهي از منکر ادارهسی خادملری ننگرهار ولایتی نینگ مرکزی جلال آباد و لغمان ولایتی نینگ مرکزی مهترلام شهرلریده عیاللر اوچون محصولات ساتهدیگن دوکان اېگهلریگه «محرمسیز عیاللرگه» هېچ قندهی محصولات ساتمسلیک حقیده کۉرسهتمه بېرگن.
منبعلرگه کۉره، اوشبو بویروق سۉنگگی کونلرده بازارلر و عیاللر بویوملری ساتیلهدیگن دوکانلرنی تېکشیریش چاغیده بېریلگن.
مهترلام شهریدهگی بیر دوکاندارنینگ ایتیشیچه، طالبان خادملری اوشبو بویروققه بۉیسونمهگن تدبیرکارلر تۉرت کون قماققه آلینیشی و اولرنینگ دوکانلری ایکّی هفتهگه یاپیلیشینی ایتیب آگاهلنتیرگن.
شونینگدېک، منبعلر نینگ بیلدیریشیچه، ننگرهاردهگی امر به معروف و نهي از منکر ادارهسی مسووللری ولایت علمالری و مسجد اماملری بیلن اوچرهشووده «حجابسیز» عیاللرنینگ حرکتلنیشینی چېکلش و اۉزلری تلقین قیلهیاتگن «شریعت» قاعدهلرینی تۉلیق تطبیق اېتیشنی طلب قیلگن.
طالبلر امر به معروف قانونینی قبول قیلگنیدن سۉنگ عیاللرنینگ جماعت حیاتیدهگی اشتراکیگه قۉییلگن چېکلاولرنی ینهده کوچهیتیرگن. اولر عیاللرگه اېرکک محرم همراهلیگیسیز سفر قیلیشگه رخصت بېرمهیدی.
اوّلراق هم مملکت نینگ باشقه اَیریم ولایتلریده دوکاندارلرگه «محرمسیز عیاللرگه» محصولات ساتمسلیک بۉییچه کۉرسهتمهلر بېریلگنی حقیده خبرلر ترقهلگن اېدی.
بوندن تشقری، اَیریم ولایتلرده طالبان شفاخانهلر، طبیات مرکزلری و ترانسپورت هیداوچیلریگه هم «محرمسیز عیاللر»نی دوالهمسلیک یاکه ترانسپورتگه چیقرمسلیک حقیده تاپشیریقلر بېرگنی ایتیلماقده.
