بیرلشگن ملتلر تشکیلاتینینگ افغانستاندهگی یاردم ماموریتی (یوناما)نینگ معلوم قیلیشیچه، قورغاقچیلیک و چۉللنیشگه قرشی کورهشیش اوچون افغانستان ییلاولریگه سرمایه کیریتیش ضرور.
یوناما بوگون (چهارشنبه، ۲۷جوزا) «چۉللنیش و قورغاقچیلیککه قرشی کورهش خلقارا کونی» مناسبتی بیلن بېرگن بیاناتیده افغانستان اقلیم اۉزگریشی نینگ «آلدینگی چیزیغیده» اېکنینی تأکیدلهدی.
بیرلشگن ملتلر تشکیلاتی وکالتخانهسینینگ آگاهلنتیریشیچه، مملکت اوزاق دوام اېتهیاتگن قورغاقچیلیک، یېرلرنینگ بوزیلیشی و سوو تنقیصلیگی بیلن یوزلشماقده بو اېسه اهالی تورموشی و آزیق-طعام خوفسیزلیگیگه جدّي تهدید سالماقده.
یونامانینگ فکریچه، اهالی نینگ کتّه قِسمی قیشلاق خۉجهلیگیگه باغلیق بۉلگنی اوچون یېرلرنی تیکلش، سوو منبعلرینی حمایه قیلیش و اقلیمگه چیدملی اصوللرنی جاري اېتیش مهمدیر.
تشکیلات ییلاولر (اۉتلاقلر)نی تیکلش و اولرگه سرمایه کیریتیش آرقهلی افغانستانده چۉللنیشنی کمهیتیریش ممکنلیگینی تأکیدلهدی.
بیرلشگن ملتلر تشکیلاتی معلوماتیگه کۉره، ییلاولر چارواچیلیک و اېکاتیزیم اوچون جوده مهم بۉلسه-ده، اولر نینگ کتّه قِسمی الّهقچان ضرر کۉرگن.
شونینگدېک، «برقرار یېر باشقرووی» و اینیقسه عیاللرنی هم قهمرهب آلگن محلي جماعهلرنی قۉللب-قوّتلش ضرورلیگی قید اېتیلدی.
افغانستان اقلیم اۉزگریشیدن اېنگ کۉپ ضرر کۉرهیاتگن دولتلردن بیری بۉلیب، گوبل اېمیسسهلرگه جوده کیچیک — تخمیناً 0،1% – حصه قۉشهدی.
شونگه قرهمهی، مملکتده کېتمه-کېت قورغاقچیلیکلر، موسملرنینگ اۉزگریشی، تاشقینلر و یېرلرنینگ چۉللنیشی کوچهییب بارماقده، بیراق بو معمالرگه قرشی خلقارا سرمایه یېترلی اېمسلیگی ایتیلماقده.
