افغانستاننینگ سابق جمهور رییسی حامد کرزی امریکا و ایران اۉرتهسیده اوروشنی توگهتیش همده معمالرنی مذاکره یۉلی بیلن حل قیلیش بۉییچه کېلیشوو یکونلنگنینی آلقیشلهدی.
سابق جمهور رییس بوگون (دوشنبه، ۲۵ جوزا) نشر قیلگن بیاناتیده اوشبو کېلیشوونی هر ایکّی تامان، منطقه و دنیا اوچون فایدهلی دېب حسابلشینی بیلدیرگن.
کرزی منطقه و دنیاده تینچلیک و برقرارلیک نینگ حیاتي اهمیتینی تأکیدلب، دولتلرنینگ اوشبو جریاننی حمایه قیلیش مجبوريتیگه اورغو بېردی. او شونینگدېک، بو کېلیشووگه اېریشیش یۉلیده واسطهچیلیک قیلگن پاکستان و قطر همده باشقه منطقه دولتلری نینگ دیپلوماتیک سعی-حرکتلرینی آلقیشلهدی.
او بو سعی-حرکتلر یکوني نتیجهگه اېریشیب، خلقارا تینچلیک و خوفسیزلیک تأمینلنیشیگچه دوام اېتیشیگه امید بیلدیردی.
امریکا جمهور رییسی دونالد ترامپ کېچه کېچقورون ایران بیلن اوروشنی توگهتیش بۉییچه کېلیشوو یکونلنگنینی معلوم قیلگن اېدی. اونینگ ایتیشیچه، بو کېلیشوودن سۉنگ هرمز بۉغازی آچیلهدی و ایرانگه قرشی دېنگیز قملی توگهیدی.
اېران ملي خوفسیزلیک کېنگشی هم بیر نېچه آیلیک مذاکرهلردن سۉنگ امریکا بیلن اوروشنی توگهتیش بۉییچه کېلیشوو یکونلنگنینی بیلدیرگن. تامانلر اوشبو کېلیشوونی کېلهسی جمعه کونی رسمي روشده امضالشلری رېجهلشتیریلگن.
