امریکا جمهور رییسی دونالد ترامپ امریکا و ایران اۉرتهسیدهگی تینچلیک کېلیشوویگه اېریشیش جوده یقین بۉلگن بیر پیتده اسرایل نینگ بوگونگی بیروت هجومی عملگه آشیریلمسلیگی کېرهک اېدی، دېب حسابلشینی بیلدیردی.
ترامپ تروثسوشیال ترماغیده یازیشیچه، اسرایل اۉزینی حمایه قیلیش حقوقیگه اېگه، بیراق بو هجوم جوده کیچیک و اهمیتسیز هجومگه جوابن عملگه آشیریلگن. اونینگ تأکیدلشیچه، اۉشه هجومده هېچ کیم هلاک بۉلمهگن یاکه جراحت آلمهگن و او مهم دیپلوماتیک جریانگه خلل بېرمسلیگی کېرهک اېدی.
امریکا جمهور رییسی، «اېندیلیکده اسرایل تامانیدن لبان نینگ هېچ بیر حدودیگه هجوم بۉلمسلیگی کېرهک. شو بیلن بیرگه، حزبالله یاکه باشقه هر قندهی تامان طرفیدن هم اسرایلگه قرشی هجوملر عملگه آشیریلمسلیگی لازم.»
او سۉزینی یکونلر اېکن: «بو اوزاق و گۉزل تینچلیک نینگ باشلنیشی بۉلیشی ممکن. کېلینگ، اونی برباد قیلمهیلیک»، دېب یازدی.
بوگون اسرایل ینه لبنان پایتختی بیروتدهگی حاضیه حدودیگه ضربه بېردی. اسرایل اوردوسی هجوم اېرتهلب حزبالله تامانیدن اسرایل حدودیگه قرهته اۉق اوزیلگنیگه جوابن عملگه آشیریلگنینی معلوم قیلدی.
مذکور واقعه امریکا و ایران اۉرتهسیده کېلیشوو «الکترون امضالش» عرفهسیده یوز بېردی. ایکّی تامان رسميلری سۉنگی هفتهلرده تامانلر هر قچانگیدن هم تینچلیک کېلیشوویگه یقینلشگنینی تأکیدلب کېلهیاتگن اېدی.
هجومدن بیر نېچه ساعت اۉتیب، ایران پارلمانی رئیسی محمد باقیر قالیباف امریکانی تنقید قیلیب، بو واقعه «امریکا اۉز مجبوريتلرینی بجریشگه یا اراده، یا امکانیتگه اېگه اېمسلیگینی ینه بیر بار کۉرستدی»، دېدی.
قالیباف شونینگدېک: «رژیمگه یشیل چیراق یاقیب بېریش آرقهلی امتیاز آلیب بۉلمهیدی. یخشی پولیس و یامان پولیس اۉیینی الّهقچان اېسکیرگن. اگر مجبوريتلرینگیزنی بجریشگه اراده و امکانیت بۉلمهسه، مذاکرهلرنی دوام اېتتیریش حقیده گپیریش نینگ معناسی یۉق»، دېب یازدی.
ایران هر قندهی کېلیشوو لبناندهگی اوروشنی تۉختهتیشنی هم اۉز ایچیگه آلیشی کېرهکلیگینی تأکیدلهماقده. بیراق امریکا و اسرایل لبنان مسألهسی بۉییچه علیحده کېلیشوو طرفداری بۉلیب، او حزبالله نینگ قورالسیزلنتیریلیشینی کفالتلشی کېرهک، دېب حسابلهماقده.
