بیرلشگن ملتلر تشکیلاتینینگ خوفسیزلیک کېنگشی بیر ییغین اۉتکزیب، بیرلشگن ملتلر تشکیلاتینینگ افغانستاندهگی یاردم ادارهسی (یوناما) تمدید بۉلیشی بارهسیده رایگیرلیک قیلهدی.
مذکور ییغیلیش اېرتهگه (دوشنبه،۲۵ جوزا) کابل وقتی بیلن ساعت۶:۰۰ده بۉلیب اۉتهدی و اونی آنلاین طرزده کوزهتیش ممکن.
بیرلشگن ملتلر تشکیلاتی خوفسیزلیک کېنگشی اۉتگن قویاشي ییل نینگ۲۵ حوت کونی یوناما ادارهسی صلاحیتینی اوچ آیگه، یعنی جاري ییل نینگ۱۷ جونیگچه اوزهیتیرگن اېدی.
اوّلگی ییللرده یوناما وکالتی عادتده بیر ییل مدتگه اوزهیتیریلر اېدی. بیراق بو ییل امریکا قۉشمه ایالتلرینینگ اعتراضی سببلی ماموریت فقط اوچ آیگه اوزهیتیریلدی.
امریکانینگ بیرلشگن ملتلر تشکیلاتیدهگی وکالتخانهسی یوناما بیرلشگن ملتلر تشکیلاتینینگ اېنگ قیمت سیاسي ماموریتلریدن بیری اېکنینی و مرکّب شرایطده فعالیت یوریتهیاتگنینی تأکیدلب، اونینگ عملدهگی وظیفهلری هنوز دالضرب و عملگه آشیریش ممکنمی یاکه یۉقلیگینی قَیته بهالش ضرورلیگینی بیلدیرگن.
وکالتخانه قیسقه مدتلی اوزهیتیریش برچه تامانلر بیلن مصلحتلشیش همده ماموریت فعالیتینی حاضرگی شرایطلرگه ماسلشتیریش اوچون امکان یرهتیشینی قید اېتگن.
شو بیلن بیرگه، بیرلشگن ملتلر تشکیلاتی خوفسیزلیک کېنگشینینگ اَیریم اعضالری آرهسیده یوناما ماموریتینینگ قیسقه مدتگه اوزهیتیریلیشی اونینگ افغانستاندهگی موقعی و تأثیرینی ضعیفلشتیریشی ممکنلیگی حقیده خواطرلر هم موجود.
یوناما ۲۰۰۲-ییلدن بویان افغانستانده فعالیت یوریتیب، سیاسي ملاقاتنی قۉللب-قوّتلش، انسان حقوقلرینی مانیتارینگ قیلیش، گومانیتار یاردمنی موافقلشتیریش و خلقارا همجمعیت بیلن علاقهلرنی رواجلنتیریش وظیفهلرینی بجریب کېلماقده.
