باميان ولایتیدهگی ایشانچلی منبعلرنینگ تصدیقلشیچه، محمد امین اسملی ییگیت اۉسمیر سینگلیسینی اۉغیرلشگه اورینگن قوراللی شخصلرگه قرشیلیک کۉرستگنیدن سۉنگ اۉق آتیب اۉلدیریلگن.
طالبلرنینگ باميان ولایتی والی ادارهسی هم حادثهنی تصدیقلب، آدم اۉغیرلشگه اورینگن شخص گروه کوچلری تامانیدن اۉلدیریلگنینی معلوم قیلگن.
منبعلرگه کۉره، محمد امین یکاولنگ اولسواللیگینینگ شمسالدین منطقهسی یشاوچیسی بۉلیب، یازگی ییلاوده چۉپانلیک قیلهیاتگن اېدی. او کمبغل عایله نینگ یگانه اۉغلی بۉلگن.
بیر منبع نینگ ایتیشیچه، اۉتگن هفته چهارشنبه کېچهسی (۲۰جوزا) «علی» اسملی شخص ینه اوچ کیشی بیلن بیرگه محمد امین نینگ ۱۲ یاشلی سینگلیسینی ییلاودن اۉغیرلب کېتماقچی بۉلگن. بیراق محمد امین قرشیلیک کۉرستگن و نتیجهده آدم اۉغیرلاوچیلر تامانیدن ایکّی مرته اۉق اوزیلیشی عاقبتیده جان بېرگن.
منبع نینگ سۉزلریگه کۉره، محمد امیننی اۉلدیریشده عیبلنهیاتگن علی جمهوریت دوریده هم اۉز خاتینی نینگ باشینی کېسیب اۉلدیرگن و قاچیب یورگن. شونینگدېک، او جمهوریت توزومی نینگ سۉنگگی ییللریده طالبلر صفیگه قۉشیلگن.
طالبلرنینگ باميان ولایتی حاکمی ادارهسی ترقهتگن بیاناتده علی گروه کوچلری بیلن بۉلگن تۉقنهشووده اۉلدیریلگنی ایتیلگن.
بیاناتگه کۉره، علی اصلیده یکاولنگ اولسواللیگینینگ «سری ترنوک» قیشلاغیده یشهگن بۉلیب، یاش بیر عیالنی اۉغیرلشگه اورینگن پیتده اونینگ اکهسینی وحشيلرچه اۉلدیرگن.
بیاناتده قید اېتیلیشیچه، جنایتدن سۉنگ علی تاغلرگه قاچیب یشیرینگن، بیراق طالبلر کوچلری اونینگ بابه تاغیدهگی قایهلر آرهسیدهگی یشیرین جایینی انیقلهگن.
معلوماتلرگه کۉره، طالبان کوچلری علینی قۉلگه آلیشگه اورینگن، اما او قرشیلیک کۉرستگن و نتیجهده یوز بېرگن قوراللی تۉقنهشووده اۉلدیریلگن.
طالبلر حاکمی ادارهسی علي نینگ اوّلگی جنایتلری حقیده هېچ قندهی معلومات بېرمهگن.
طالبلر مملکتده خوفسیزلیک تأمینلنگنینی دعوا قیلهیاتگنیگه قرهمهی، آدم اۉغیرلش، قوراللی تالانچیلیک و قاتللیک کبی جنایتلر همان دوام اېتماقده.
