افغانستانلیک مهاجر شاعرلر، مدنیت اربابلری و یازووچیلر همده دنیانینگ باشقه مملکتلریدن کېلگن شاعر و ادیبلر اشتراکیده تۉقّیزینچی خلقارا صلصال شعریت فستیوالی بوگون (شنبه، ۲۳-جوزا) سویدن نینگ «اوپسالا»ی شهریده بۉلیب اۉتدی.
«سویدن صلصال بیرلشمهسی» نشر قیلگن بیاناتگه کۉره، فستیوال خلقارا قلم اویوشمهسی اۉرین باسری «تری کارلبوم»، نینگ نطقی بیلن باشلندی. او اۉز سۉزیده فکر اېرکینلیگی و مدني تکثرگرایی نینگ اهمیتیگه علیحده اعتبار قرهتدی.
صلصال تدبیری دوامیده افغانستان نینگ تنیقلی یازووچیلریدن بیری محمد آصف سلطانزاده نینگ ادبي فعالیتی اعتراف اېتیلدی. شونینگدېک، یازووچی و تدقیقاتچی محمد جواد خاوری اونینگ ایجادی همده بدیعي عالمی حقیده معروضه قیلدی.
صلصال تۉقیزینچشی فستیوالده افغانستانلیک مهاجر شاعرلر لطیف ناظمی، سمیه رامش، امان پویامک، محبوبه ابراهیمی، میرحسین مهدوی، نامدار ناصر، مژگان فرامنش، شکیلا شعله، بشیر رحیمی، تانیا عاکفی، شفیقه یارقین دیباج، زبیر هجران و حمیرا طاری، اۉز شعرلریدن نمونهلر اۉقیب بېردیلر. شونینگدېک، سویسلیک شاعرلر لارش هگر و جاسم محمد هم فستیوال مهمانلری اوچون شعرلر اۉقیدیلر.
افغانستانلیک تنیقلی خانهده الهه سرور هم فستیوالده اشتراک اېتیب، اشتراکچیلر اوچون قۉشیقلر اجرا اېتدی.
فستیوال تشکیلاتچیلریدن بیری بۉلگن تنیقلی افغانستان شاعری محمد شریف سعیدي نینگ ایتیشیچه، بو ییلگی فستیوال شعریت، بدیعي ادبیات و مدنیت موضوعلریگه بغیشلنگن بۉلیب، افغانستاندهگی عیاللر احوالیگه علیحده اعتبار قرهتیلگن. شو سببلی فستیوالده عیال شاعر و یازووچیلر نینگ اشتراکینی کېنگراق تأمینلشگه حرکت قیلینگن.
اونینگ تأکیدلشیچه، افغانستاندهگی عملدهگی توزوم «شعریت و مدنیتگه قرشی» بۉلسه-ده، سویدنده فکرلر اېرکین افاده اېتیلیشی و ادبیاتگه اعتبار قرهتیلیشی اوچون امکانیت موجود. شو باعث فستیوالده عیاللر احوالی و افغانستان عیاللرینینگ بوگونگی شرایطدهگی آوازینی عکس اېتتیریشگه علیحده اورغو بېریلگن.
خلقارا صلصال شعریت فستیوالی بو ییل سویدن نینگ «اوپسالا»ی شهریده کېتمه-کېت تۉقّیزینچی مراتهبه اۉتکزیلدی. فستیوال بوگونگی کونده اروپادهگی افغانستانلیک مهاجرلر و فارسي زبانلر اوچون مهم مدني تدبیرلردن بیریگه ایلنگن بۉلیب، هر ییلی اروپا و دنیا نینگ باشقه مملکتلریدن کېلگن افغانستان شاعرلری همده مدنیت اربابلرینی بیر جایگه جمعلهیدی.
