پاکستان تشقی ایشلر وزیرلیگی ایران و امریکا اۉرتهسیدهگی کېلیشوونینگ الکترون طرزده امضالش مراسمی اېرتهگه (یکشنبه، ۲۴-جوزا) اۉتکزیلیشی رېجهلشتیریلگنینی معلوم قیلدی.
وزیرلیک محمد اسحاقدار، پاکستان تشقی ایشلر وزیری و سعوديه عربستانی تشقی ایشلر وزیری فیصل بن فرحان اۉرتهسیدهگی تیلفون ملاقاتی حقیده اعلان قیلگن بیاناتیده اوشبو مسألهگه تۉختهلیب اۉتگن.
بیاناتده ایتیلیشیچه، اولر امریکا و ایران اۉرتهسیدهگی مذاکرهلرنینگ یکوني باسقیچگه یېتیب کېلگنینی ممنونیت بیلن کوتیب آلگن همده اېرتهگه رېجهلشتیریلگن «الکترون امضالش» مراسمینی انابتگه آلیب، بو مهم اۉزگریش منطقهده برقرار تینچلیک، خوفسیزلیک و آسایشتهلیکنی تأمینلشیگه امید بیلدیرگن.
بوندن بیر نېچه ساعت آلدین پاکستان باش وزیری شهباز شریف هم ایران و امریکا اۉرتهسیدهگی کېلیشوو یقین۲۴ ساعت ایچیده یکونلنیشی کوتیلهیاتگنینی ایتگن اېدی.
اونینگ قۉشیمچه قیلیشیچه، پاکستان کېلیشوونینگ الکترون امضالش مراسمیگه تیارگرلیک کۉرماقده و ایکّی تامان اۉرتهسیدهگی تخنیکي مذاکرهلر هم کېلهسی هفتهدن باشلنهدی.
پاکستان ایران و امریکا اۉرتهسیدهگی مذاکرهلرنینگ اساسي واسطهچیسی حسابلنهدی. حمل آیی نینگ 19-کونیده اۉرنهتیلگن اۉت آچیشنی تۉختهتیش کېلیشوویدن سۉنگ، اسلام آباد ایکّی تامان نینگ یکوني کېلیشووگه اېریشیشی اوچون فعال سعی-حرکت آلیب بارماقده.
