پاکستان باش وزیری شهباز شریف ایران و امریکا قۉشمه ایالتلری اۉرتهسیدهگی کېلیشوو یقین۲۴ ساعت ایچیده یکونلنیشی کوتیلهیاتگنینی معلوم قیلدی.
پاکستان باش وزیری بوگون (شنبه،۲۳ جوزا) ایکس اجتماعي ترماغیده نشر قیلگن پُستیده شوندهی یازدی: «بیز حاضر هر قچانگیدن هم کۉپراق تینچلیک کېلیشوویگه اېریشیشگه یقین توریبمیز.»
شهباز شریف نینگ ایتیشیچه، پاکستان حاضرده مذکور کېلیشوونی «الکترون امضالش» اوچون ضرور شرایطلرنی تیارلهماقده. شونینگدېک، کېلهسی هفتهدن «تخنیکي مذاکرهلر» هم باشلنیشی رېجهلشتیریلگن.
او مذاکرهلر دوامیده کۉرستگن دایمي همکارلیگی و مجبوريتلری اوچون امریکا قۉشمه ایالتلر همده ایرانگه، شونینگدېک، قۉللب-قوّتلهگن منطقه دولتلریگه منّتدارلیک بیلدیردی.
پاکستان باش وزیری شوندهی دېدی: «بیز اوشبو تاریخي تینچلیک کېلیشووی اوزاق مدتلی و برقرار تینچلیکنی تأمینلش اوچون مستحکم پایدېوار یرهتیشیگه ایشانهمیز.»
بوندن آلدین امریکا جمهو رییسی دونالد ترامپ هم ایران بیلن ماجراگه یکون یسهلگنینی بیلدیرگن و ایکّی مملکت اۉرتهسیدهگی کېلیشوو ایران نینگ اېنگ یوقاری رهبریتیگه تقدیم اېتیلیب، معقوللنگنینی ایتگن اېدی.
ایران تشقی ایشلر وزیری عباس عراقچی هم تامانلر هر قچانگیدن کۉره کېلیشووگه یقینلشگنینی تأکیدلهگن. بیراق او عامهوي اخبارات واسطهلرینی کېلیشوو مضمونی حقیده تخمینلر ترقهتمسلیککه چقیردی.
