چېگرهسیز داکترلر تشکیلاتی هراتده اوشبو تشکیلات بیلن ایشلهیاتگن عیال داکترلردن بیری طالبان نینگ «امر به معروف و نهي از منکر» خادملری تامانیدن کيینیش قاعدهلریگه رعایه قیلمهگنی سببلی حبسگه آلینیب، ایکّی کوندن کېین آزاد قیلینگنینی معلوم قیلدی.
تشکیلات نینگ جمعه کونی (۲۲ جوزا) اعلان قیلینگن بیاناتیده ایتیلیشیچه، طالبلر اوشبو عیال شفاکاردن کېلگوسیده اۉزلری طلب قیلهیاتگن مجبوري کيینیش قاعدهلریگه رعایه قیلیش حقیده یازمه مجبوريت آلگن.
چېگرهسیز داکترلر معلوماتیگه کۉره، شفاکار اۉتگن هفته شنبه کونی ( ۱۶ جون) هرات ولایت کسلخانهسیگه کېتهیاتگنیده اېری بیلن بیرگه حبسگه آلینگن.
تشکیلات اۉز خادمهسی نینگ حبسگه آلینگنیدن غضبده اېکنینی بیلدیرگن. معلوم قیلینیشیچه، مذکور عیال داکتر هرات کسلخانهسی نینگ بالهلر بۉلیمیده فعالیت یوریتهدی.
بیاناتده تأکیدلنیشیچه، بو حادثه یکّه حالت اېمس. عینِ پیتده افغانستاندهگی عیاللر حرکتلنیش و جماعت حیاتیده اشتراک اېتیش بۉییچه جوده قتّيق چېکلاولرگه دوچ کېلماقده. بو اېسه مملکت بۉیلب طبي خدمتلردن فایدهلنیش و ساغلیقنی سقلش خدمتلرینی کۉرسهتیشگه بېواسطه سلبي تأثیر کۉرسهتماقده.
طالبان اۉتگن هفتهدن بویان هراتده بیر قطار عیاللر و قیزلرنی اۉزلری بېلگیلهگن کيینیش قاعدهلریگه رعایه قیلمهگنی اوچون حبسگه آلگن. اوشبو حبسلر کېنگ کۉلملی سلبي مناسبتلرگه سبب بۉلدی.
هرات نینگ جبریل منطقهسی اهالیسی عیاللر و قیزلرنینگ حبسگه آلینیشیگه قرشی نمایش اویوشتیردی، بیراق طالبان نمایشنی کوچ ایشلهتیب باستیردی. حادثهلر دوامیده بیر کیشی هلاک بۉلگنی، بیر نېچه کیشی یرهلنگنی و ینه بیر قطار فقرالر حبسگه آلینگنی خبر قیلیندی.
چېگرهسیز داکترلر تشکیلاتی عیاللرگه نسبتاً قۉشیمچه چېکلاولر، جملهدن برقع کيیشنی مجبوري قیلیش و اوی تشقریسیده اېرکک محرم همراهلیگینی طلب اېتیش، ضرور طبي خدمتلردن فایدهلنیش امکانیتینی ینه-ده ضعیفلشتیرهیاتگنینی قید اېتدی. شونینگدېک، بو حالت عیال طبیات خادملری نینگ اۉز وظیفهلرینی بجریشیگه هم تۉسقینلیک قیلماقده.
طالبان سۉنگگی بېش ییل دوامیده عیاللر و قیزلر نینگ تعلیم آلیشی همده ایشلشیگه تورلی چېکلاولر جاري اېتگن. حاضرده افغانستان ساغلیقنی سقلش تیزیمی عیال داکترلر یېتیشماوچیلیگی معماسیگه دوچ کېلماقده. شو بیلن بیرگه، اَیریم ولایتلرده عیال بېمارلرنی اېرکک داکترلر تامانیدن دوالش تعقیقلنگن. بعضی حدودلرده اېسه عیاللر اېرکک همراهسیز طبي خدمتلردن فایدهلنیش امکانیتیدن محروم اېتیلگن.
