ایراننینگ خراسان رضوی ولایتیدهگی چېت اېل فقرالری و مهاجرلر ایشلری باشقرمهسی افغانستانلیک مهاجرلرنی رسمي رخصتنامهسیز ناراضیلیک نمایشی اۉتکزمسلیک حقیده آگاهلنتیردی.
مذکور اداره بوگون (جمعه، ۲۲جوزا) اعلان قیلگن بیاناتیده، «هر قندهی ییغیلیش قانوني جریانلردن اۉتیشی و صلاحیتلی اۉرگانلردن آلدیندن رخصت آلینیشی شرط»، دېب تأکیدلهگن.
تسنیم خبرگزارلیگی تامانیدن نشر قیلینگن بیاناتده شوندهی دېییلهدی: «ایرانده یشاوچی چېت اېل فقرالری تامانیدن رسمي رخصت آلمهسدن تشکیل اېتیلگن هر قندهی چقیریق، ییغیلیش یاکه ناراضیلیک ناقانوني حسابلنهدی و اونگه نسبتاً قانوني چارهلر کۉریلهدی.»
خراسان رضوی ولایتی نینگ چېت اېل فقرالری و مهاجرلر ایشلری باشقرمهسی افغانستانلیک مهاجرلردن اۉز فعالیتلرینی ایران قانون-قاعدهلری دایرهسیده آلیب باریشنی سۉرهدی.
اداره رخصتسیز ییغیلیشلر «حقوقي عاقبتلر و جوابگرلیکلر» کېلتیریب چیقریشی ممکنلیگینی هم اېسلهتگن.
سۉنگگی ایکّی کون دوامیده اَیریم یاشلر اجتماعي ترماقلرده مشهد شهریده طالبلر نظارتی آستیدهگی افغانستان قنسوللیگی آلدیده ناراضیلیک نمایشی اۉتکزیشگه چقیرووچی مراجعتلرنی ترقهتگن اېدی.
چهارشنبه و پنجشنبه کونلری اېسه بیر گروه عیاللر تهران شهریده افغانستان اېلچیخانهسی همده بیرلشگن ملتلر تشکیلاتی وکالتخانهسی آلدیده ناراضیلیک اۉتکزدیلر.
اوشبو نمایشلر طالبان تامانیدن عیاللرنینگ حبسگه آلینیشی و هرات شهریدهگی نمایشچیلرنینگ کوچ بیلن باستیریلیشیگه قرشی تشکیل اېتیلگن اېدی.
