افغانستان شیعه علمالری کېنگشی هراتده عیاللرنینگ طالبلر تامانیدن حبسگه آلینیشی و جبریل اهالیسینینگ نمایشی زۉروانلیک بیلن باستیریلیشیگه مناسبت بیلدیریب، طالباندن عیاللر کییمی مسألهسیده حددن تشقری قطعي یاندشوودن واز کېچیش همده ناراضیلیک ییغینلرینی زۉروانلیکسیز نظارت قیلیشنی سۉرهدی.
کېنگش چهارشنبه کونی (20 جوزا) نشر قیلگن بیاناتیده جبریل حدودی اهالیسی نینگ نمایشی باستیریلگنیگه هم تۉختهلیب، طالبلر کوچلری ییغیننی کوچ ایشلهتمسدن هم نظارت قیلیشی ممکن بۉلگنینی تأکیدلهدی.
بیاناتده شوندهی دېییلهدی: «اسلام امیرلیگی خادملری، اینیقسه محتسبلر اۉز فعالیتلریده اسلام شریعتی، خلق عرف-عادتلری و هر بیر مذهب ایزداشلریگه تېگیشلی فیقه حکملرنی انابتگه آلیب، آدملرنینگ حس-تویغولرینی قۉزغهتووچی کېسکین و حددن تشقری حرکتلردن تيیلیشلری لازم.»
کېنگشنینگ قید اېتیشیچه، طالبان جبریل اهالیسی نینگ تینچ ییغیلیشینی زۉروانلیککه ایلنتیریب یوبارگن.
بیاناتده ایتیلیشیچه، فقرالر تینچ نمایش آرقهلی «امر به معروف و نهي از منکر» ادارهسی تامانیدن اوشلب توریلگن عیاللرنی آزاد قیلیشنی طلب قیلگن، بیراق واقعه زۉروانلیک بیلن یکونلنگن و نتیجهده بیر نېچه کیشی هلاک بۉلگن همده یرهلنگن.
شیعه علمالری کېنگشی عیاللرنی حبسگه آلیش کبی مسألهلرده علمالر، آقسقاللر و محلي نفوذلی شخصلر معمالرنی طالبان بیلن ملاقات و مذاکره یۉلی آرقهلی حل اېتیشلری کېرهکلیگینی تأکیدلهدی. شونینگدېک، یاشلرنی هم آقسقاللر بیلن مصلحتلشمسدن خلق و مملکت اوچون خوفلی عاقبتلرگه آلیب کېلیشی ممکن بۉلگن حرکتلرگه قۉل اورمسلیککه چقیردی.
بیانات یکونیده کېنگش اَیریم شخصلرنینگ اۉزلرینی شیعه علمالری کېنگشی وکیلی صفتیده تنیشتیریب، طالبلر نظارتیدهگی عامهوي اخبارات واسطهلریگه بېرگن بیاناتلرینی رد اېتدی.
کېنگشنینگ بیلدیریشیچه، هراتده «جبریل و اونینگ اطرافی» نامی بیلن فعالیت یوریتهدیگن رسمي وکالتخانهسی موجود اېمس و شو سببلی بوندهی شخصلرنینگ بیاناتلری کېنگش موضوعینی عکس اېتتیرمهیدی.
اېسلهتیب اۉتمیز، سهشنبه کونی (19 جوزا) جبریلدهگی ناراضیلیک نمایشی طالبان تامانیدن کوچ بیلن باستیریلگن، عاقبتده کمیده بیر کیشی هلاک بۉلگن و 20 دن آرتیق کیشی یرهلنگن اېدی. شوندن سۉنگ بیر شخص طالبان نظارتیدهگی یېتکرمهلرگه چیقیب، اۉزینی شیعه علمالری کېنگشی نینگ جبریلدهگی وکیلی صفتیده تنیشتیرگن و خلق نمایشلرینی قارهلهگن اېدی.
