بیرلشگن ملتلر تشکیلاتی باش کاتبینینگ سۉزلاوچیسی فرحان حق، هرات نینگ جبریل منطقهسی اهالیسی نمایشینینگ باستیریلیشیگه مناسبت بیلدیریب، طالباندن تینچ نمایشچیلرگه قرشی «کېرهکسیز کوچ ایشلهتیش»دن تيیلیشنی سۉرهدی.
بیرلشگن ملتلر تشکیلاتی باش کاتبی سۉزلاوچیسی چهارشنبه کونی (۲۰ جوزا) نیویارکده اۉتکزیلگن مطبوعات انجمنیده طالبان هراتدهگی خلق ناراضیلیگینی ترقهتیش اوچون «جنگاور اۉق-داریلر»دن فایدهلنگنینی، نتیجهده کمیده بیر نفر باله هلاک بۉلگنی و ینه بیر نېچه کیشی یرهلنگنینی ایتدی.
او «خوفسیزلیک کوچلری تینچ نمایشچیلرگه قرشی هر قندهی کېرهکسیز یاکه نامتناسب کوچ ایشلهتیشدن سقلنیشی کېرهک»لیگینی تأکیدلهدی.
بیرلشگن ملتلر تشکیلاتی سۉزلاوچیسی نینگ ایتیشیچه، اوشبو ناراضیلیک نمایشی طالبان تامانیدن کيینیش اسلوبی سبب کمیده۳۰ نفر عیالنینگ حبسگه آلینیشی آرتیدن یوزهگه کېلگن.
فرحان حقنینگ معلوم قیلیشیچه، (اوچا) خبریگه کۉره، طالبان شو هفته هراتده «اۉنلب عیال و قیزلرنی، جملهدن اَیریم طبیات خادملرینی» هم «قطعي کيینیش قاعدهلریگه رعایه قیلمهگنی» اوچون حبسگه آلگن.
اونینگ قۉشیمچه قیلیشیچه، بیرلشگن ملتلر تشکیلاتی افغانستاننینگ برچه اهالیسی، جملهدن عیاللر و قیزلر ضرور خدمتلر همده انسانپرورلیک یاردمهلریدن اېرکین و خوفسیز فایدهلنیشی ممکن بۉلگن محیط یرهتیلیشینی طلب قیلماقده.
سهشنبه کونی (۱۹ جوزا) هرات شهرینینگ غربي قِسمیدهگی جبریل منطقهسی اهالیسی طالبان تامانیدن عیاللرنینگ حبسگه آلینیشیگه قرشی ناراضیلیک نمایشی اۉتکزگن.
واقعه گواهلری تامانیدن ترقهتیلگن تصویرلرده طالبلر کوچلری نمایشچیلرگه جوده یقین مصافهدن تۉغریدن-تۉغری اۉق اوزهیاتگنی کۉرینهدی.
حاضرچه بیر نفر باله نینگ هلاک بۉلگنی تصدیقلنگن. بیراق محلي منبعلر ایکّی کیشینینگ اۉلیمی حقیده خبر بېرماقده. یرهدارلر سانی انیق اېمس، اما محلي منبعلرگه کۉره، طالبان کوچلری تامانیدن اۉق، ساچمه اۉق، تیاق و پیچاق بیلن هجوم قیلینیشی عاقبتیده۲۰ نفردن آرتیق کیشی جراحت آلگن.
