بوگون چهارشنبه (۲۰ جوزا) فرانسه پارلمانیده، مذکور مملکتده استقامت قیلهیاتگن افغانستانلیک عیاللر، عیال حقلری فعاللری، ژورنالیستلر، صنعتکارلر، سپورتچیلر و مدنی فعاللر نمایندهلری اشتراکیده ییغیلیش بۉلیب اۉتدی.
تدبیر سیاره رحمانی تشبثی بیلن تشکیل اېتیلیب، اونینگ اساسي مقصدی افغانستان عیاللرینینگ بوگونگی احوالی همده فرانسهدهگی افغانستانلیک مهاجر عیاللرنینگ معمالری و امکانیتلرینی محاکمه قیلیشدن عبارت اېدی.
ییغیلیش نینگ مهم قِسمی فرانسهدهگی افغانستانلیک مهاجر عیاللرنینگ حالتینی تحلیل قیلیشگه بغیشلندی. اشتراکچیلر تیل اۉرگنیشدهگی قیینچیلیکلر، تعلیم و کسبي امکانیتلردن فایدهلنیش، دیپلوم و متخصصلیکلرنینگ تن آلینیشی، ایش بازاریگه کیریش همده فرانسهنینگ اجتماعي و مدنی حیاتیده فعال اشتراک اېتیش مسألهلری یوزهسیدن فکر المشدیلر.
شونینگدېک، تدبیر دوامیده افغانستان عیاللری حقوقلرینی حمایه قیلیش و مهاجر عیاللرنینگ جمعیتگه انتیگراسیونلشووینی قۉللب-قوّتلش اوچون عیاللر، مدنی تشکیلاتلری و سیاسي قرار قبول قیلووچیلر اۉرتهسیدهگی همجهتلیک ضرورلیگی علیحده تأکیدلندی.
اشتراکچیلر فرانسه پارلمانیدهگی اوشبو تدبیر تشکیلاتچیلری و مېزبانلریگه منّتدارلیک بیلدیریب، افغانستان عیاللرینی قۉللب-قوّتلش همده افغانستانلیک عیاللرنینگ فرانسه جمعیتیدهگی فعال اشتراکینی مستحکملش یۉلیده، مدني و اجتماعي فعالیتلرینی دوام اېتتیریشگه صادق اېکنلیکلرینی بیلدیردیلر.
