پاکستان اخبارات و نشرات وزیری عطاءالله تارر، پاکستاننینگ افغانستاندهگی «فتنه الخوارج» (تیتیپی)گه تېگیشلی یشیرین مسکنلر و خوفسیز باشپناهلرگه اویوشتیرگن هجوملری نتیجهسیده اوشبو گروه نینگ۲۶ اعضاسی اۉلدیریلگنینی معلوم قیلدی.
او بوگون چهارشنبه (۲۰-جوزا) اعلان قیلگن بیاناتیده بو عملیاتلر پاکستاندهگی سۉنگّی ترورچیلیک حادثهلریگه جوابن عملگه آشیریلگنینی ایتدی. جملهدن، موسی دره حدودیدهگی پولیس پوستهسیگه هجوم، شمالي وزیرستاندهگی خودکوشلیک هجومی و بنو شهریدهگی ینه بیر پولیس پوستیگه قیلینگن هجوم تیلگه آلینگن.
تارر اوشبو هجوملرنی «انیق و پُخته رېجهلشتیریلگن» دېب تعریفلب، لاگېرلر و یشیرین مسکنلر یوقاری انیقلیک بیلن نشانگه آلینیب یۉق قیلینگنینی تأکیدلهدی.
اونینگ سۉزلریگه کۉره، یۉق قیلینگن مقصدلر آرهسیده اۉقوو مرکزی، یشیرین باشپناه، اۉق-داریلر انباری همده تیتیپی قوماندانلری علیم خان خوشالی و اخترمحمد جانی خیلگه تېگیشلی مرکزلر هم بار.
بونگه جوابن طالبلر پاکستان کېچه تونده خوست، کنر و پکتیکا ولایتلریدهگی «تینچ اهالی اویلرینی» بامباردمان قیلگنینی بیلدیرگن.
طالبلر سۉزلاوچیسی ذبیحالله مجاهدنینگ معلوم قیلیشیچه، اوشبو هجوملرده۱۳ کیشی، جملهدن۱۱نفر باله هلاک بۉلگن، ینه۱۴نفر عیال و باله یرهلنگن.
مذکور هجوملر طالبان و پاکستان قریب بیر آی آلدین چېگرهنینگ ایکّی تامانیدهگی قبیله آقسقاللری واسطهچیلیگیده صلح اعلان قیلگنیدن کېین صادر بۉلدی.
تامانلر اۉرتهسیدهگی ینگی قوراللی قرهمه-قرشیلیک ۲۰۲۶-ییل فبروری آییده باشلنگن بۉلیب، حاضرچه ماجرانی یکونلش بۉییچه کېلیشووگه اېریشیلمهگن.
