افغانستاننینگ سابق جمهور رییسی حامد کرزی پاکستان نینگ خوست، کنر و پکتیکا ولایتلریگه اویوشتیرگن سۉنگگی هوا هجوملرینی کېسکین قارهلهدی.
کرزی بوگون چهارشنبه (۲۰-جوزا) نشر قیلگن بیاناتیده اوشبو هجوملرنی افغانستان حاکمیتی و توپراغیگه تجاوز دېب بهالب، قربانلر عایلهلریگه اۉزهمدردلیگینی بیلدیردی.
کرزینینگ قۉشیمچه قیلیشیچه، پاکستان منطقهدهگی اۉیلهمسدن یوریتیلگن سیاستی و دشمنانه حرکتلری نینگ عاقبتلری بیلن یوزمه-یوز توریبدی. او شونی بیلیشی کېرهککی، بو سیاستلرنی دوام اېتتیریش و اولرگه تهیهنیش آرقهلی اۉز مقصدیگه اېریشه آلمهیدی.»
سابق جمهور رییسنینگ تأکیدلشیچه، پاکستان اوچون اېنگ تۉغری یۉل افغانستانگه نسبتاً اوروش و ویرانهگرچیلیک سیاستیدن واز کېچیب، یخشی قۉشنیچیلیک همده مدني مناسبتلر یۉلینی تنلشدیر.
طالبان معلوماتیگه کۉره، پاکستان کېچه کېچقورون خوست، کنر و پکتیکا ولایتلریده «تینچ اهالی اویلرینی» بامباردمان قیلگن.
طالبلر سۉزلاوچیسی ذبیحالله مجاهد نینگ ایتیشیچه، هجوملر عاقبتیده کمیده۱۳ کیشی، جملهدن ۱۱نفر باله جان بېرگن، ینه۱۴ کیشی یرهلنگن.
پاکستان حاضرچه اوشبو هجوملر یوزهسیدن رسمي مناسبت بیلدیرمهگن.
مذکور هجوملر طالبان و پاکستان قریب بیر آی اوّل چېگرهنینگ هر ایکّی تامانیدهگی قبیله آقسقاللری واسطهچیلیگیده صلح اعلان قیلگنیدن کېین صادر بۉلدی.
طالبان و پاکستان اۉرتهسیدهگی ینگی تۉقنهشوولر جاري ییل فبروری آییده باشلنگن بۉلیب، تامانلر هنوزگچه ماجراگه یکون یسش بۉییچه کېلیشووگه اېریشمهگن.
