افغانستان آزادلیک جبههسی هراتده عیاللرنینگ حبسگه آلینیشی و طالبلر تامانیدن نمایشلرنینگ باستیریلیشیگه مناسبت بیلدیریب، طالبلرنینگ «امر به معروف و نهي از منکر» خادملری بو باسقیچده «عیال اۉغیرلش» و عایلهلردن پول اوندیریشگه اۉتگنینی دعوا قیلدی.
جبهه بوگون کېچقورون (سهشنبه،۱۹ جوزا) اعلان قیلگن بیاناتیده شوندهی دېگن: «طالبلر هراتده عیاللرنی آلیب کېتگنیدن سۉنگ، حبسگه آلینگن هر بیر عیالنی آزاد قیلیش عوضیگه۱۲ مینگ افغاني نقد پول و اولرنینگ عایله اېرککلری تامانیدن تقدیم اېتیلهدیگن کفالت خطینی طلب قیلگن.»
جبههنینگ تأکیدلشیچه، بوگون هراتنینگ بیر گروه یشاوچیلری «عیاللر و قیزلرنینگ شأنی همده انساني قدر-قیمتیگه تجاوز قیلینیشی، اولرنینگ آلیب کېتیلیشی و عایلهلریدن پول طلب قیلینیشیگه قرشی» ناراضیلیک نمایشی اۉتکزگن.
بیاناتگه کۉره، طالبان اوشبو نمایشنی کوچ بیلن باستیرگن و بونینگ عاقبتیده بیر قطار نمایشچیلر هلاک بۉلگن همده یرهلنگن.
جبهه شونینگدېک، طالبان نمایشلردن کېین هم «جراحتلنگن اَیریم عیاللرنی شفاخانهلردن آلیب کېتگنینی» ادعا قیلگن.
بیاناتده ینه شوندهی دېییلهدی: «طالبلرنینگ بو خطی-حرکتی نه ینگی حادثه و نه آخرگیسی بۉلهدی. طالبلرنینگ طبیعتی و ماهیتی ظلم، کمسیتیش و زۉروانلیک بیلن چنبرچس باغلنگن.»
افغانستان آزادلیک جبههسی هرات اهالیسینینگ بوگونگی عذاب-عقوبتلرینی چوقور حس قیلیشینی بیلدیرر اېکن، مملکتنی موجود آغیر وضعیت و اسارتدن چیقریش اوچون برچه امکانیتلرینی سفربر اېتیشینی تأکیدلهگن.
بیانات یکونیده قوییدهگی فکرلر کېلتیریلگن: «طالبلر آدملرگه اوروش یاکه قوللیکنی قبول قیلیب، ظلم آستیده یششدن باشقه یۉل قالدیرمهدی. افغانستان خلقی اېسه قوللیک و تسلیم بۉلیش خلقی اېمس.»
بوگون هراتنینگ جبریل منطقهسی اهالیسی طالباننینگ «امر به معروف و نهي از منکر» خادملری تامانیدن عیاللرنینگ حبسگه آلینهیاتگنیگه قرشی نمایش اۉتکزدی.
بیراق طالبان کوچلری نمایشنی اۉق اوزیش و تیاقلردن فایدهلنیش آرقهلی ترقهتدی. اۉق اوزیلیشی عاقبتیده کمیده تۉرت کیشی، جملهدن بیر باله جراحت آلگن.
شونینگدېک، بیر عیال و بیر بالهنینگ هلاک بۉلگنی حقیده تصدیقلنمهگن خبرلر هم موجود. اما بو معلوماتلر مستقل منبعلر تامانیدن تصدیقلنمهگن.
سۉنگّی کونلرده طالبلرنینگ «امر به معروف و نهي از منکر» ادارهسی هراتده عیاللرگه نسبتاً چېکلاولرنی کوچهیتیریب، جبریل و شهرنینگ باشقه حدودلریدن اۉنلب عیاللرنی اۉزلری بېلگیلهگن حجاب قاعدهلریگه رعایه قیلمهگنلیک عیبی بیلن حبسگه آلگن.
